Koordînasyonê Teqîb û Çimdarîya Grevê Vêşanîye yo ke hetê Baroyê Amedî, ÎHD, OHD û TUAY-DERî ra ronîyayo,  Amed de bi kombîyayîşêkê çapemenîye raporê serê grevê vêşanîye yê zîndanan eşkera kerd.

Sekretera Komîsyonê Çimdarîya Zîndanan ê Baroyê Amedî Reyhane Gok rapor wend. Reyhane Gok vist vîrî ke tepişteyê sîyasîyî 22 rojî yo grevê vêşanîye de yê û vat: ''Tepişteyî wazenê ke wa tecrîdê vera Abdullah Ocalanî bêro wedaritene, Ocalan bieşko keye û avûkatanê xo bivîno û binpaykerdişê heqan zîndanan de biqedê.

Gan, rûmet, asayîş û weşîya tepişteyan binê mesuldarîya dewlete de yê. Nê prosesê grevî de zîndanan de qedexeyê şeker, sol û vîtamînan est ê ke no yew îşkence yo. Eke no qedexe dewam bikero grevê vêşanîye de sey serranê verênan mergî do biqewimîyê. Ganî rêxistinê weşîye zî seba pawitişê heqanê tepişteyan têbigêrê.

Tecrîdê Îmraliyî dûştê Peymana Heqanê Merdiman a Ewropa (AÎHS), Qanûnê Bingeyîyî û Qanûnê Zîndanan o. Ganî îqtîdar cade waştişanê tepişteyan bîyaro ca. Nêbo grevê vêşanîye do bibo sebebê netîceyanê xiraban û îqtîdar zî do bibo mesuldarê nînan. Coka Wezîrîya Edaletî û dezgehê eleqedarî wa cade têbigêrê. 

Ganî bi rayîranê haştîye û muzakereyan îqtîdar tepişteyan de waştişanê înan ser o qisey bikero. Ma venga Wezîrîya Edaletî, rêxistinanê heqan û huqûqî yê neteweyî û mîyanneteweyîyan danê ke babeta grevê vêşanîye de hîsger bibê.''