Hemserekê Kongreya Komelê Demokratîkî (KCD) Berdan Ozturk ANFyî rê qisey kerd ke ganî çira şar turê diyînî yê weçînayîşê serekkomarîye de raya xo bido Kemal Kiliçdarogluyî.

Ozturkî vist vîrî ke Partîya Çep a Keske rixmê zehmetî û hêrişan zî kewte weçînayîşan û şarê kurdî zî rixmê hêriş û teda wayîrê partîya xo vejîya. Ozturkî vat: ''Şarê ma waştişê xo yê seba demokrasî û azadîye berz kerd. Xora kêmasîyê ma est ê la ma do nînan eşkera bikerê. Seke zanîyeno vera partîya ma hema zî operasyonê destbendkerdiş û tepiştişî yenê kerdene. Serê medyaya dîjîtale de zî tay spekulasyonî yenê kerdene. Nê manîpulasyonî hetê hişmendîya HUDA PAR û PDKyî ra yenê kerdene. Xora tîya de zî kêmasîyê ma est ê.''

Ozturkî îfade kerd ke pêro operasyonê qirkerdişê sîyasîyî seba turê diyînî yê û vat: ''Îqtîdar 8 serrî yo zulm û teda nêverda ke kurdan rê kerd. Ma do turê diyînî de cewabê nê hêrişan, cenazayanê xo û zulmê vera ma do bipersê. Êyê ke ewro rexneyê îtîfaqê ma kenê faşîzm û dîktatorîya Erdoganî pawenê.  Pêroyî teslîmê Erdoganî bîyê. Êyê ke teslîm nêbîyê zî xo ver danê zî est ê. Ma cuyêka têdûşte wazenê. Şarê ma ganî 28ê gulane de raya xo bido û dişmenanê şarê kurdî bin bivisno. 

A raşte şarê ma cara turê yewinî de cewabêko pîl a. Nê welatî de meseleya kurdan, meseleya demokrasî est ê. Ma hînî edalet û huqûqî wazenê. Şerê vera kurdan ra teyna sermayedaran fayde kerd. Ma bi rayîrê hîrêyînî xîret kenê ke rayîrê demokrasî, azadî û huqûqî akerê. Coka ma raya xo nêdanê şexsêkî. Seba feraseto ke gonîya kurdan rijneno, bin bikewo ma do raya xo bidê.''