Endama Koma Haştîye ya Diyîne Aysele Dogan serrgêra hîrêyîne ya wefatê ci de Dêrsim de Goristanê Asrî de ameye yadkerdene. Keyeyê Aysele, temsîlkarê partîyan, Hemşaredarê Dêrsimî Cevdet Konako ke herinda ci de qeyûm amebi tayînkerdene û xeylê merdimî tewrê yadkerdişî bîyî.

Girseyî qeranfîlî nayî gorê Aysele ser. Hemserekê DEM Partî yê Dêrsimî Ozcan Ateşî yadkerdiş de vat ke nameyê Aysele Dogan ked, haştîye û têkoşînî ano vîran û vat: ‘’Ma do xeta embaze Aysele de têkoşîn bîyarê ca.’’

Waya aye Menşure Dogan zî îfade kerd ke Aysele Dogan seba waştişê azadîye 10 serrî zîndan de menda û vat: ‘’Ma rayîrê aye de qetî waya xo teyna nêverda. Ma bi aye sereberz ê. Seba Sakîne û Saime a zaf bermabî.’’

Girseyî dima gorê Sakîne Cansiz zîyaret kerd.