Mêrdîn û Êlih de çalakîyê vera destsernayîşê şaredarîyanê kurdan dewam kenê.

Mêrdîn de polîsan hêrişê girseyê nobeta demokrasîyî kerd. Şarî bi çepik û berzkerdişê sloganan vera polîsan tewirê xo mojna. Şarî dormeyê şaredarîye de bi deyan çalakîye rê dewam kerd. Tîya de Wekîla DEM Partî ya Mêrdînî Bêrîtane Guneş vat: ''Reya hîrêyîn a ke îradeyê şarî yena xespkerdene. Ma do her roje saete 15î ra pey tîya de bibê. Ma verê şaredarîya xo de yê. Ma wazenê ke îradeyê şarê ma wa bişinasîyo.''

Êlih de Hemserekê DBPyî Keskîn Bayindir, Hemşaredara Êlihî Gulîstane Sonuk û Wekîlê DEM Partî zî tede bi seyan kesî taxanê Êlihî de ameyî têhet. Girseyî bi sloganan taxan de rayraşîyayîş kerd,  esnafî zîyaret kerdî û venga pêro şarê êlihî da ke wa wayîrê îradeyê xo vejîyo. Şarî zî bi çepikan paştî daye girseyî.

Hetê bînî ra taxanê Petrolkent, Baglar, Cudi û Petrolî yê Êlihî de ciwanê ke vejîyayî waran rixmê astengkerdişê polîsan bi tafînayîşê adirî xespkerdişê îradeyî protesto kerd. Polîsan bi gazê îsotî, TOMA û mermîyanê plastîkan hêrişê ciwanan kerd. Ciwanan zî dormeyê rayîrî de adir vist ta, pê kerra û fîşeganê hewayî cewab da.