Bi kurdkî xizmetnêdayîşê Merkezê Vengdayîşê Lezabezî 112 o ke bi 5 ziwanan xizmet dano ame rojdemê meclîsî. Wekîla HDPyî ya Amedî Semra Guzel derheqê babete de seba ke Wezîrê Weşîye Fahrettîn Koca cewab bido vernîyazê persî da meclîsî.                                                                                       

Guzele vat: "112 de bi erebkî, îngîlîzkî, tirkî, almankî û ruskî xizmet yeno dayene. La Tirkîya de  hema hema pêro şaristananê ci de bi temamî 20 mîlyon kurdî ciwîyenî û Merkezê Vengdayîşê Lezabezî 112 de xizmetê bi kurdkî nêno dayene. Bi nê hewayî no pers yeno mezgê merdimî ke Merkezê Vengdayîşê Lezabezî 112 senî eşkeno xizmet bido hemwelatîyanê ke têna kurdkî zanenê.

Guzele vernîyaz de nê persî persayî: "Merkezê Vengdayîşê Lezabezî 112 de çira kurdkî çin a? Derheqê na babete de şima do xebatêke bikê? Seba ke 20 mîlyon hemwelatê kurdî bi ziwanê xo yê dayîke kurdkî xizmetê weşîye bigêrê çi xebatêka şima esta?"