Rojhelatê Kurdîstanî û Îran de protestoyanê ke vera qetilkerdişê Jîna Emînî dest pêkerd yew aşme xo dima verdaye. Hemserekê Partîya Cuya Azade ya Kurdsîtanî  (PJAK) Siyamend Mouiniyî rewşe ANFyî rê ercna.

Mouinîyî verê kesê ke Rojhelat û Îran d ameyî qetilkerdene yad kerdî û vat: ''Rejîmo dîktator ê Îranî pê şîdetî cewabê waştişanê demokratîkan dano. Inkey serkêşîyê cinîyan de şorişêk qewimîyeno ke do morê xo bido tarîxî ro. Sîstemê Îranî serûbin bîyo. No şoriş têna Îranî nê, do pêroyê Rojheletê Mîyanênî bibedilno. Çalakîyê şaranê Rojhelat û Îranî do heme herême ser o tesîr bikerê. Slogana  ‘Jin, jiyan, azadî’ bîya slogana têgêrayîşêkê azadîye. Kesê ke heta inkey tewrê protestoyan nêbîyî ganî ê zî wirzê payan ser. Ganî heme hetî ra şarî tewrê nê têkoşînî bibê. Şarê Belucî zî rejîmê faşîstî ra zaf ant. Ganî şarê Belucî û şarê bînî zî pêro pîya têkoşînî xurtêr bikerê. Ganî pêro şarê kurdî pîya têkoşîn bikero. No şorişo ke şarê kurdî serkêşîya ci keno ganî peynîya rejîmê faşîstî yê Îranî bîyaro û semedê kurdan û şaranê bînan berê ronayîşê sîstemêkê demokratîkî abikero. Şaranê Îranî binê eynî sîstemî de dejê hemparî antî, zulm dî. Coka qederê înan yew o. Azerî, ereb, belucî û kurdî eşkenê bi têkoşînê hemparî nê sîstemî birijnê.''