Hemsereka Kontonê Cizîrî yê Rojawanî Nazîra Gavrîye seba ke derheqê îşxalê dewleta tirke de zanayîş bida rayaumûmîye û sîyasetmedaran dest pê turê Ewropa kerd. Gavrîye Swêdî de derheqê pêvînayîşan de ANFyî reyde qisey kerd: 

"Sîyetmedarî, temsîlkarê rexistinanê komelkî yê Ewropa ke ma tede pêvînayîşan kenê zûrê Erdoganî yê îşxalî ra bawer nêkenê û zanenê ke armancê Erdoganî têna pakîya etnîke ya herême yo.

QSDyî zanayêne ke armancê Tirkîya wina yo. QSD seba ke qirkerdişan asteng biko xo herêman ra tepîya ant û DYA û Rûsya QSD neçare kerd ke Tirkîya reyde peymana leşkerî biko. 

Dewleta tirke her cayê dinya de polîtîkayê parçekerdişî xebitna. Her qirkerdişî ra dima hûmara ma bîye kêm.

Heta ke mesela Sûrîye bi hawayêkê haştîyane çareser nêba zehmetê asayîşê şarî do dewam bikê. Eke artêşa rejîmê Sûrîye estbîyayîşê sîyasîyî yê herême û tepîyaancîyayîşê QSDyî seba xo firsendêk bivîna û goreyê naye têbigêra rîskê şerî do bivejîyo meydan.

Tirkîya şerê Sûrîye de rolêko zorbaz kay kerd. Verê cû ger ro Sûrîye wendêne labelê mîyanê çend serran de gefê xo vurnayî kerdî îşxalkerîye. Bi nê hawayî tay dewletan destûr da ke Tirkîya Efrîn îşxal bika.

Eke nêro astengkerdene Erdogan do demografîyê herême bivurno û asûrî-sûryanîyan û kurdan herême ra dûrî bivisno.
Erdogan seba ke demografîyê herême bivurno xo ra gêreno manayan. Tewr peynî de PKK û kurdî seba xo kerdî mana. Nê pêro seba plananê ey ê vera herême bahane yê. Seba ke sîstemê domakratîkî meydan ra biwedarobi nê hawayî têgêreno.

Têkoşînê vera DAÎŞî de ma 11 hezar şehîdî dayî. Ma Vakurê Sûrîye DAÎŞ ra pak kerd. Hîrê pareyê welatî destê QSDyî de yê. Her kes zaneno ke şarê Sûrîye Vakurê Sûrîye de pîya rayîrêk ra şinê û vera îşxalan pîya xo ver danê."