Dewa Çirikî ya qezaya Kanîreşî ya Çewlîgî de xeylêk merdimî nêweşê sîlîkozîsî yê. Wekîla HDPyî ya Îzmîrî Serpîle Kemalbay derheqê babete de Meclîs de qisey kerd û ard ziwan ke hacîz şino keyeyanê nê nêweşan ser.

Serpîle Kemalbay vist vîrî ke dewe de hema hema pêro dewijî nêweşê sîlîkozîsî yê û 21 kesan zî na nêweşîye ra dinyaya xo bedilnaye. Serpîle Kemalbay vat: ''Nê merdimî seba ke kargehanê xizkerdişê kotan de xebitîyayî pê na nêweşîye kewtî. Seba ke dewlete nê kargehî kontrol nêkerdî, nê merdimî bîyî nêweş. Heta têkoşînî ra dima na nêweşîye sey 'nêweşîya meslegî' ameye qebulkerdene. Ewro seba ke karkeranê xizkerdişê kotan dewaya 'tesbîtê xizmetî' vînî kerde, haciz şino keyeyanê nêweşanê sîlîkozîsî ser . Nêweşê sîlîkozîsî neçare manenê ke axpînanê xo biroşê û mesrafanê dewa bidê.''

Serpîle Kemalbay pare kerd ke nêweşê sîlîkozîsî sey 'nêweşanê meslegî' nêhesîbîyenê û vat: ''Binê şertanê normalan de nê merdimî 'seba ke nêweş ê' bêrê teqawutkerdene. La têna ge ge meaşê astengdarîye yo kêm dîyeno înan û haciz erşawîyeno keyeyanê înan.''