Keyeyanê tepişteyanê nêweşan û tepişteyanê ke înfazê înan ameyo vêşnayene, Îstanbul de Meydanê Emînonu de Nobeta Edaletî kerde. Wekîla HDPyî ya Îstanbulî Zuleyha Gulum zî paştî daye çalakîye.

Polîsan çalakîye girewte binê ablûqa û destûr nêda ke nobete bêra girewtene. Polîsan hêrişê keyeyan kerd û dadîyê tepişteyan Kumrîye Akgul, Fincê Akman, Cemîle Çîftçî û Cemîle Karakaş pey ra kelemçe kerdî û destbend kerdî.

Wekîla HDPyî Zuleyha Gulum vera polîsan nêrazîbîyayîşê xo mojna û îfade kerd ke îqtîdar û polîsê ci bi nê hêrişan wazenê vengê tepişteyan û keyeyanê înan nêvejîyo. Gulume ard ziwan ke îqtîdar nêwazeno vengê qirkerdişê zîndanan bêro eşnawitene û vat: ''Wazenê ma bêveng bikerê la ma do bêveng nêbê. Ma do tim edaletî biwazê. Sansûrê şima yê çapemenîye zî do nêeşko ma bêveng bikero.''