Endamê Heyetê Îmraliyî yê DEM Partî Sirri Sureyya Onderî badê eşkerayîya adribirnayîşî ya PKKyî Anqara de eşkerayîye daye.

Onderî ard ziwan ke înan eşkerayîye pawêtene û da pêhesnayene ke ewro ra tepîya bi tewrbîyayîşê wezîfedaranê dewlete û sîyasîyan tay kombîyayîşî do bêrê kerdene. Onderî vat: ''Ma hêvî kenê ke zereyê 3 aşman de her çî do bêro serûberkerdene.''

Onderî ard ziwan ke qismê giran ê mesele înan xo dima verdayo û vat: '' Heyna hewte do bi tewrbîyayîşê wezîfedaranê dewlete û sîyasîyan tay kombîyayîşî bêrê kerdene û xeylê çîyî  bêrê zelalkerdene.''

Persê ronayîşê çekan do senî bibo ser, Onderî wina vat: ''Derheqê nê de ez nêeşkena nika ra çîyêk vajî. Çîyo muhîm o yo ke îrade û qerardarîye ke vejîyayî meydan.  Peyê ci do her qeyde bêro serûberkerdene. Eke verî ma bi samîmîyetî û cîdîyetî rojdemê xo sey Tirkeya bifîne yew halî  û bifîne rayîr, hemleyê demokratîkê hêzdarî ke eşkenê dinya û herême bibedilnê têdima yenê.''