Parlamenterê Partîya Demokratîke ya Şaran (HDP) yê Dêrsimî Alîcan Onluyî ke rê rojdem erjna bale antê nê nuqtayan ser:

''Vîrusê Korona rîyê talankerdişê xoza ra vejîya werte. Xora sîtemê kapîtalîzmî zî bi xo nêweşîyêk a. Nê dewro ke teknîk her roje hînî aver şino de vera vîrusî bêçareyîye esta. Wazenê ke komelî bikerê bêçare.

Îqtîdaro ke semedê dergkerdişê emrê xo tedbîran geno semedê weşîya şarî tedbîran nêgeno. Şaredarîyan de qeyûmî yenê cakerdene û vernîya hetkarî yeno girewtene. Senî ke wextê xoverdayîşanê xoîdarekerdişî de bajarî ameyî rijnayene û weçîniteyan rê hêriş ame kerdene nika zî vera zîndanan planê çokdayîşî dewre de yo. Îqtîdar semedê pawitişê xo komelî keno feda. Xeylêk welatan de bê cîyakerdişî çarçeweya tedbîranê vera Korona de tepişteyî ameyî veradayene. Ewro tepişteyanê sîyasîyan zîndan de verdayîş yeno manaya îdam û qetilkerdişê înan.

Xora Îmrali ra zî xebere nîna girewtene. Birêz Ocalano ke weşîya ey yena manaya weşîye şarî seba ke nêweşîye ci estî û rîyê serranê ci ra binê rîskî de yo. Ganî cade pêvînayîş bêro kerdene û tedbîrê vera janî bêrê girewtene.

Partîya ma bi Kampanyaya Keyeyê Wayûbirayî wazena ke pîya pawitişê weşîya şarî bingeyê paştdayîşê hemparî bipawê. Bi na kampanya Kurdîstan de yewîya neteweyîye û metropolanê Tirkîya de wayûbiratîya şaran do aver şiro.

Hûkmatê AKPyî bi zext û hêrişan wazeno ke şar verê înan de çok bido. Xore hukm sifatê xo vîn kerdo. Nimûne yo tewr peyên de ma dîye ke cenaza ya Egîd Îpekî ke Dêrsim de pêkewtişêk de cuya xo vînî kerde bi kargo keyeyê ci rê ameye şawitene.

Planê Çokdayîşî ya ke 2014 de qerarê ci ame girewtene û 2015 ame caardene. Çarçweya nê planî de Şirnex, Mêrdîn, Amed û Colemêrg de xeylêk cayê roniştişî ameyî rijnayene, bi seyan kesî ameyî kiştene û bi hezarn kesî ameyî tepiştene. Qanûnê înfazî bizanayîş raşt prosesê janî ame ke planê çokdayîşî yê dîyinî yeno bêro caardene.''