Başûrê Kurdîstanî de Tirkîya pîya bi PDKyî hêrişê gerîlayaan kena. Dîmenê çekanê kîmyewîyan ê ke nê hêrişan de ameyî şuxulnayene bîyî sebebê nêrazîbîyayîşanê pîlan. Şuxulnayîşê çekanê kîmyewîyano ke kirişîya rojdemê mecslî hetê Wezîrê Pawitişî yê Tirkîya Hulusi Akarî ra ame redkerdene. Hetê bînî ra derheqê Sereka TÎHVî Pîspora Tibê Edlîyî Prof. Dr. Şebneme Korur Fincanci de lezabez cipersayîş dîya destpêkerdene.

Wekîlê HDPyî Hîşyar Ozsoyo ke babete nizdî ra teqîp keno ANFyî rê rewşe ercna û vat ganî heyetêko xoser şiro herême û cigêrayîş bikero.

Ozsoyî vist vîrî ke muneqeşeyê hêrişanê çekanê kîmyewîyan ê Başûrê Kurdîstanî newe nîyê û vat: ''Herêma ke qala ci yena kerdene de 6-7 aşmî yo pêkewtiş û şer est o. Xora dewanê dormeyî de zî dewijê ke raştê gazanê kîmyewîyan ameyî nêweşxaneyan de ameyî tedawîkerdene. O wext zî di heyetê cîya cîyayî şîyê herême ke cigêrayîş bikerê la çi heyf ke Îdareyê Herême yê Başûrî destûr nêda înan. Hem zî uca îdareyêko bi xo raştê hêrişanê çekanê kîmyewan ameyo, qirkerdişê Helebçe dîyo, est o. Xora no tewirê înan nîno qebulkerdene.''

Ozsoyî bale ante dîmenanê peyênan ser û vat: ''Îdîayê cîdîyî est ê la wezîrê pawitişî keno ke serê na mesele bîgêro. Têna yew rayîrê vergirewtişê nê muneqeşeyan est o. Ganî yew heyeto xoser şiro herême û cigêrayîş bikero. Eke na babete de qisawetê înan çîn o, wa verê şîyayîşê heyetêkê xoserî a bikerî.''

Hîşyar Ozsoyî seba ke Şebneme Korur Fîncanci sey hedefî ameyî mojnayene nêrazîbîyayîş mojna û vat: Mamoste Şebneme seba ke dîmenê ke dîyî  waşt wa derheqê ci de cigêrayîş bêro kerdene sere de serekkomar Erdogan her kesî a sûcdar kerd. Reyna seba ke Selahattîn Demîrtaşî derheqê babete twîterî ser o eşkerayîye daye her kes şi ey ser. Rewşa winayên de muxalefeto ke ganî wirzo payan ser reyna bêveng mend. Verî zî Dêrsim de şar pê gazan ame qetilkerdene. No hetê qeydanê fermanîyan ê dewlete ra yeno vatene. Rixmê naye teberê Sezgîn Tanrikuluyî de vengê wekîlanê bînan ê CHPyî nêvejîyeno. Senî ke mamoste Şebneme zî vat ganî heyetêko xoser ê mîyanneteweyî şiro herême de cigêrayîş bikero. Teberê nê de vatiş û muneqeşeyê bînî têna semedê qefilnayîşê babete yê.''

Ozsoyî vist vîrî ke dewlete tim pê şîdetî nizdîyê meseleya kurdan bena û vat: ''Ma zaf rey dî ke dewlete qet şertan nas nêkena.Coka vatişê 'kulturê ma de çîyê sey îşkence û ceza çîn ê' yê Akarî vatişo veng o. Dewê kurdan nêameyî vêşnayene? Mabênê kuçeyan de şar nêame kiştene? Ganîyan caverdê, merdeyan rê zî îşkence ame kerdene. Serranê 90yan ra na bebete de hendê dinya arşîv est o. Nika Hulusî Akar vano çîyê winayên çîn ê. No şar wayîrê vîrî yo. Şar goş dano vatişê to, ya da vîrê xo? Ma bi çimanê xo dî dewan de senî şarî rê îşkence ame kerdene. Eke verê sîyasetî  bêro girewtene xora verê şîdetî yeno akerdene. No eşkera yo. Xora nê hukmatî ra yew pawitiş û hêvîya ma çîn o. La kam ke Tirkîya de huzur û haştîye wazeno ganî meseleya kurdan çareser bikero. Nêbo na mesele hema kena derg û şarî vînî kenê. Îqtîdarî zî reyna meseleyanê wînayênan şuxulnenê ke îqtîdar de bimanê.''

Ozsoyî vat ê do heta peynî na mesele teqîp bikerê û seba ke babet bêro cigêrayene ê do sey HDPyî çîyo ke destê ci ra bêro bikerê.