Hemvervatoxê Komîsyonê Têkilîyanê Teberî û Wekîlê HDPyî Hişyar Ozsoyî ANFyî rê qisey kerd û da zanayene ke hêrişê îşxalî yê ke 17ê nîsane de ancî dest pêkerdê seba zixmkerdişê îqtîdarê AKP-MHPyî yo.

Ozsoyî vat: ''Dewlete pê pêro îmkananê xo hêrişê kurdan kena. Eşkera yo ke tîya de têkoşînêko çetin est o, rewşêka şerî est a. Şerê Rûsya-Ukrayna serê asayîşê Ewropa û hîrakerdişê NATOyî de Tirkîya rê zemînêko cidî yo dîplomatîk û sîyasî viraşyo. Tirkîya xîret kena ke nê zemînî bişuxilna û pê tedaya vera Swêd û Fînlandîya dişmenîya vera kurdan ser o NATO bianco masaya bazarîye. Wexto ke îmkanê çareserîya meseleya kurdan zere de est bi, no îmkan nêşuxilîya. Nika meseleya kurdan rojdemê NATOyî de ya. Qet yew serekkomarê Tirkîya hende Erdoganî na mesele nêkerdbî meseleya dinya. Erdogan xîret keno ke merkezanê winasênan reyde bazarîye bikera, tawîzan bigêra, eke firsend bivîna hêrişê Rojawanî bikera. La cayê çareserîya meseleya kurdan Tirkîya, Anqara, Amed, Qamişlo yo.''

Ozsoyî bale ante ser ke Erdoganî derheqê hêrişêkê neweyî yê vera Rojawanî de eşkerayîyî dayî. Ozsoyî vat: ''Erdogan wextêkê dergî ra nata amadekarîyan keno. Xora hişmendîya dewlete tim seba hêrişanê vera kurdan amade ya. Erdogan wazeno weçînayîşan ra ver serfîrazîyêka qije bivisno destî. Erdoganî pêro weçînayîşan ra verî hêrişê kurdan kerd. Beno ke reyna wina bo.

Ame dîyene ke dewlete heta nika hêrişanê vera Zap, Avaşîn û Metîna de çîyêk nêvisto destî. Nika beno ke Erdogan hêrişê Rojawanî bikero. Erdogan wazeno hîkayayêka serfîrazîye binuso û vajo 'Şewêke ma nişka ra kewtî û vejîyayî.' Çunke Erdogan sîyasetê zereyî de teng bîyo û ci rê serfîrazîyêka sexte lazim a. Erdoganî pêro weçînayîşan ra verî meseleya kurdan de şer û pêkewtiş şuxilna. Ma hêvî kenê ke partîyê muxalîfî sey leşkeran peyê Erdoganî de nêkewê rêz û tewirêkê cîyayî bimojnê.''