HDP, KCD û Platformê Rojnamegeranê Cinîyan ê Mezopotamya pê eşkerayîyanê nuştekîyan Roja Rojnamegerîya Kurdî fîraz kerde. 

Rojnamegerê Cinîyî: ''Çapemenîya kurdî raywanîya seserre de morê xo da binê serkewtişanê girîngan. Aya tewr girînge zî çapemenîya xosere ya cinîyan a. Raywanîya ma zehmet û derg zî ba roşnî ya. Çunke no rayîr hetê Mîqdad Mîdheq Bedirxan heta bi Mûsa Anter, Gûrbetellî Ersoz, Ayfer, Nûjiyan, Rohatan ra pê bawerî ame akerdene.''

KCD: ''Ma pê na wesîle Roja pêro rojnamegeran fîraz kenê ke krîteranê rojnamegerîye ra tawîz nêdayî, ma înan rê selam kenê. Ma venga îqtîdaran danê ke rojnamerê kurdî yê tepişteyî cade vera bidê. Rojnamegerîya kurdî rixmê pêro astengan û îqtîdaran aver şîye, bedelê pîlî dayî, bîye pîl. Ma pê nê averşîyayîşî sereberz ê. Ma venga şarê xo danê ke wayîrê rojnamegeran bivejîyo û paştî bido înan.''

HDP:''Tarîxê rojnamegerîya kurdî tarîxê wayîrvejîyayîşê ziwanê dayîke, nasname û welatî yo. Tarîxê çapemenîya kurdî hetê bînî ra tarîxê roşnvîrîya kurdkî û xoverdayîşî yo ke na rojnamegerîye tim vera tedayan xo ver da. Nê 122 serran de rojnamegerê kurdî ameyî tepiştene, qetilkerdene, destbendkerdene, remnayene. Rojnamegerîya kurdî seba ke raştîye tarîtîye ra bixelisna hema zî xo ver dana. 22ê Nîsane Roja Rojnamegeran ê Kurdan û Çapemenîya Kurdî û serrgêra 122. ya ronayîşê Rojnameyê Kurdistanê pêro kedkaranê çapemenîya kurdî rê fîraz bibê! Ma pêro şehîdanê çapemenîya kurdî bi rehmet, rêzdarî û mînnetî yad kenê.''