Partîya Çepe ya Swêdî: Ma qeyûman qebûl nêkenê

Wekîlê Partîya Çepe ya Swêdî  Daniel Riazatî  vat paratîya înan qebûl nêkena ke dewleta tirke îradeyê şarê kurdî xesp kena û herinda ci de qeyûm cakena.

Wekîlê Partîya Çepe ya Swêdî  Daniel Riazatî  yo ke xeylêk rayî sûcê şerî yê deleta tirke kiriştî parlamentoyê Swêdî û rojdemê rayapêroyîye vat ma qeyûmanê îqtîdarê AKP-MHPyî yê ke îradeyê şarê kurdî xesp kenê qebûl nêkenê.

Riazatî ke ANFyî rê qisey kerd vat: ''Tirkîya de sîtemê dîktatorîye esta. Dima ke heme hêzê kewt destê Serekkomar Erdoganî hêrişê vera kurdan  û muxalîfan zêdîyayî. Bitaybetî zî HDP û Têgêrayîşê Kurdan sey hedef yenê girewtene. Seba ke dinya vera nê hêrişan bêveng mamena Erdogan zî vera sendîkayan, hetanê çepan û kurdan çiyo ke dest ci ra yeno keno. Weçînayîê herêmî yo peyênî de AKP û Erdoganî bajarê girdî kerdî vînî. Reyna bajaranê kurdan de zî bin kewt.  Şaredarîye ke bi weçînayîşî nêeşka bîgêro bi qeyûman xesp keno.

Gama ke dewleta tirke serra 2016î de bi qeyûman îradeyê şarî xesp kerd Swêd û dinya de vengê nêrazîbîyayîşî vejîya la na rey bêvengîye esta. Qeyûm  bi sey çîyêkê normalî. Seba ke dinya rojdemê giranî estî qeyûman medya de zaf canêgirewt la sebebo tewr pîlî oyo ke Erdogan bi multecîyan Ewropa tehdît keno. Erdoganî Ewropa kerda sey rehîneyê xo. Coka vera qeyûman bêvengîye esta. Ma sey partîyanê çepe û keskan qeyûm ard rojdemê partlamentoyî. Ma paştdayîşê xo yê HDP û şaredarîyanê kurdan gird kenê û xespkerdişê îradeyî û qeyûmanê Tirkîya qebûl nêkenê. Ma do seba kongreya HDPyî ya ke do aşma sibate de bêro viraştene delegasyonêk bişawe.''