Rayberê Şarê Kurdî Abdullah Ocalan Zîndanê Îmraliyî de binê tecrîdêkê giranî de tepişîyeno. 25ê adara 2021î ra nata ey ra xeberêke zî nêna girewtene. Vera tecrîdî warê mîyanneteweyî de kampanyayî yenê kerdene.

Tewr peyên 16ê gulane de Îzlanda de Kombîyayîşê Berzî yê Konseya Ewropa de endamanê heyetanê beşdaran tecrîdê Îmraliyî ard bi rojdemî û azadîya Abdullah Ocalanî waşte. Endama nê heyetan ra yewe zî Profesora Sosyolojî û Antropolojî ya Zanîngehê Teksasî Denise O'Hearn a. 

Denise O'Hearna ke pispora zîndanan a, derheqê tecrîdê Îramliyî de rojnameyê Yeni Ozgur Politika rê qisey kerd.

Denise O'Hearna ke zîndananê tîpê H-Fyî ser o xebitîyena, da zanayene ke dinya ser de yew nimûneya bîne ya tecrîdê Îmraliyî yê vera Rayberê Şarê Kurdî Abdullah Ocalanî çin a.

O’Harne vat: ''Zîndanê Super-Maxî yê ke şerê ıraqî ra dima Amerîka hem xo de hem zî Afganîstan de awan kerdê, tay manenê sîstemê tecrîdî yê Îmraliyî. Mi welatêkê bînî de sey tecrîdê vera Birêz Ocalanî yew çi nêdî. Ez zanena ke zîndanê winayênî nimîyenê. Dinya de yewna ca de çîyo winayên çin o ke avûkat û keyeyî nêeşkenê tepişteyan bivînê. Wextê Almanyaya Nazîyan de zî tepişteyî eşkayêne têkilîye virazê. Zîndananê tarîyan (SuperMax) ra Ewropa şermeyena û derheqê nînan de qisey nêkena. La Tirkîya Îmraliyî ra nêşermayena û nê sîstemî domînena.''

O’Harne seba ke verê tecrîdî de bêveng a Yewîya Ewropa rexne kerde û vat: ''Çew vera kerdişanê serê Ocalanî çîyêk nêkeno. No dirîtî ya. Ganî Yewîya Ewropa seba nê kerdişan Tirkîya rê ambargo bikera. La komelê Ewropa çîyêk nêkeno. Ganî Ewropa seba ke heqanê merdiman û huqûqê mîyanneteweyî bîyara ca Tirkîya rê teda bikera. Goreyê Krîteranê Mandelayî tepişteyî 15 rojan ra zêdeyêr bêtêkilî nêmanê û eke wina bibo no beno îşkence. Ganî Ewropa Tirkîya rê vaja ke 'Şima Ocalanî rê îşkence kenê.' 

Ganî welatî, rêxistinê heqanê merdiman bikerê ke çîyêk nêro mîyankerdene. Ganî çîyê ke Îmrali de qewimîyenê eşkera bibê. Ganî pêro dinya bizana ke çi yeno Ocalanî sereyî.''