Rîyê vîrusê Korona ra ameyêne waştêne ke Taksîm de fîrazşayîya sembolîke ya 1ê Gulane bêra kerdene. Polîsan fîrazşayîye ra verî dormeyê bînaya Konfederasyonê Sendîkayanê Kedkaran ê Şorişgêran (DÎSK) girewte.
Rixmê ablûqa zî Sereka Pêroyî ya DÎSKî Arzu Çerkezoglu û îdarekaranê sendîkayan pê çelengê 1ê Gulane bîna ra vejîyayî. Verê Arzu Çerkezoglu û îdarekaran hetê polîsan ra ame tepiştene. Polîsan nêverda ke sendîkayî ver bi Taksîmî şorê. La dima ke rixmê astengîyan zî sendîkayan dest pê rayraşîyayîşê xo kerd polîsan hêrişê înan kerd.

Çelengî hetê polîsan ra ameyî parçekerdene û Arzu Çerkezoglu zî tede zaf kesî ameyî destbendkerdene. Sekretero Pêroyî yê DÎSKî Adnan Serdaroglu, Serekê Dev-Yapi-Îş Ozgur Karabulut, Serekê Sendîkaya Werd-Karî Seyît Arslan, Serekê Sendîkaya Enerjî Suleyman Keskîn zî ameyî destbendkerdene.

Çerkezoglu hesabê xo yê medyaya komelkîye de nê çîyî pare kerdî: ''Ma nezaret de yê! Ewro wexto ke her cayê Tirkîya de karkerî xebitîyenî  nîzamê umûmîye nêxeripîya la fîrazşayîya karkeran nîzamê umûmîye xeripnaya!''