Endamê Yewîyanê Xopawitişê Sîvîlî  (YPS) Mehmethan Yildizo ke 14ê adara 2016î de xoverdayîşê xoîdarekerdişî yê Şirnexî de şehîd bibi, cenazaya ci badê şeş serran dîyaye keyeyê ci.

Cenzaya Yildizî goristanê bêkesan ê dewa Milga Şantîye ra ameye girewtene û ameye berdene qezaya Pasûrî ya Amedî. Keyeyî waşt cenazaya xo merkezê qeza de Goristanê Yeni de defin bikero. Polîsanê ke dekewtişê qeza de keye vindarna bi bahane ''belge de cayê definkerdişî bewlî nîyo'' destûr nêda tîya cenaza bêro definkerdene. Keyeyî naye sero waşt cenaza Goristanê Yenikoyî yê qezaya Baglarî de defin bikero la polîsan bi eynî bahaneyî destûrê nê zî nêda. Badê pawitişê bi saetan, keyeyî cenaza berde dewa Hacana ya Pasûrî û binê ablûqaya polîsan de defin kerde.Têna desûr dîya ke şarê keyeyî tewrê cenaza bibo.  Keyeyî waşt merkezê Pasûrî de tezîye rono la polîsan destûrê nê zî nêda.