Qezaya Qaxizmanî ya Qersî de destsernayîşê şaredarî  ame protestokerdene. Verê banê partî ra heta meydanê qeza rayrayîş ame kerdene. Badê rayraşîyayîşî eşkerayîye ameye dayene. Hemşaredarê Qaxizmanî Mehmet Alkan,Gunere Hatay, wekîlê DEM Partî Nejle Demir, Heval Bozdag û Yilmaz Hun û xeylê kesî tewrê eşkerayîye bîyî.

Wekîla DEM Partî Nejle Demir nê vatî: ''Seke yeno zanayene rixmo ke di reyî qeyûm ame cakerdene şar şi sindoq ser û wayîrê îradeyê xo vejîya. Îqtîdar  îradeyê kurdan ra zaf tersayo ke reyna qeyûm ame cakerdene. Şima eşkenê hêzê dewlete bişuxulnê û dest şaredarîyan sernê la çîyo esas xoverdayîşê şarî yo. Ma do bi xoverdayîşî ser bikewê.''

Hemşaredarê Qaxizmanî Mehmet Alkanî zî nê vatî: ''Qeyûm çimê şarê ma de bêîtîbar o. Na şaredarîya şarî ya. Qeyûmî nêeşkenê verê ma bigîrê. Ma do sey tim xover bidê wayîrê îrade û erjanê xo bivejê.''

Hemşaredara Qaxizmanî Gunere Hatay zî nê vatî: ''Eke qala kurdan bibo huqûq zî cîya yeno caardene. Dewaya vera hemşaredarê ma huqûqî nîya. Kenê ke bi qeyûman îradeyê şarê kurdî bigîrê binê lingan la şarê ma sey tim do wayîrê îradeyê xo bivejîyo. Şarê kurdî do çirey têkoşînê xo yê azadîye cameverdo.''

Wekîlê DEM Partî yê Îdirî Yilmaz Hunî zî bale ante nê xususan ser: ''Hemşaredarê ma sey îradeyê şarî ameyî vîjnayene. Memuro ke ameyo tayînkerdene ma qebul nêkenê. Vera qeyûmî do têkoşînê ma yo demokratîk dewam bikero. Seke yeno zanayene nê rojanê peyênan de dostê kurdan zî yenê hedefgirewtene. Kenê ke kurdan Tirkîya de îzole bikerî. Se beno wa bibo şarê kurdî do milê xo çewt nêkero.''