Badê hêrişê îşxalî yê dewleta tirke yê vera Başûrê Kurdîstanî Wezîra Karanê Teberî yê Almanya Annalena Baerbock persanê muxaletî  ser o vatbi ''heqê Tirkîya est o ke xo bipawo.''

Dima ra Wekîla Partîya Çepe Gukaye Akbulut vatbi hêrişê îşxalî yê dewleta tirke û hêrişê Rûsya yê vera Ukrayna seyyewbînan ê û parsayebî ke qey hukmatê Almanya seycîye tewir nêgeno? Hukmat zî vatbi: ''Rûsya hêrişê welatêkê fermîyî keno la Tirkîya vana a goreyê Madeyê 51. yê Pêkerdişê  Yewbîyayenê Neteweyîyan (NY) heqê xo yê meşrûyî şuxulnena.''

Naye ser o wekîle Akbulute muracatê Daîreyê Xizmetanê Zanistî yê Meclîsê Federelî yê Almanya kerd. Akbulute persaye ke hêrişê îşxalî yê dewleta tirke yê Başûrê Kurdîstanî goreyê huqûqê mîyanneteweyî senî yeno destgirewtene. Daîreyî raporê xo de vat  bandura Iraqî yena binpaykerdene.

Raporo ke 17ê gulana 2022yî de ameyo amedekerdene destê ANFyî de yo. Raporî ra tay nuqteyî wina yê: ''Medyaya ke hukmatê tirkî ra nêzdî ya de ame vatene ke 'PKK amadekarîya hêrişî pîlî keno, coka Tirkîya dest pê operasyonê 17ê nîsane kerd.' Nê xeberî raşt nêbî. Tirkîya vat a goreyê Madeyê 51. yê Pêkerdişê  Yewbîyayenê Neteweyîyan heqê xo yê meşrûyî şuxulnena la herra Iraqî de hêrişêkê PKKyî çînêbi. Coka argumanê Tirkîya şikdar ê. Xora çalakîyê PKKyî demê peyênî de zereyê sînorê Tirkîya de zî kêmîyayî. Iraq de estbîyayîşê PKKyî meseleya Iraqî ya. Tirkîya zirar dana bandura Iraqî û heqanê welatêkê cîranî binpay kena. Tirkîya bi xo madeyê 51. yê NYyî binpay kena.''

Gukaye Akbulut derheqê raporê ke semedê vindarnayîşê hêrişanê Tirkîya aye keno, de ANFyî rê qisey kerd. Akbulete waşt Hukmatê Federalî yo ke serekwezîrîya ci Olof Scholz keno, wa semedê vindarnayîşê hêrişan têbigêro. Akbulute bale ante ser ke binê versîya şerê Ukrayna de Tirkîya hêrişê xo yê vera Başûrê Kurdîstanî hîra kena û nê vatî: ''Tirkîya bi hêrişê xo yê vera kurdan huqûqê mîyananeteweyî binpay kena. Seba ke hêrişê PKKyî çîn ê, no xopawitiş nîyo. Na rewşe raporê serwîsê zanistî yê Meclîsê Federelî de yena vatene. Rapor eşkera ramojneno ke huqûqê mîyanneteweyî yeno binpaykerdene. Tirkîya SÎHAyanê xo de teknolojîyo ke Almanya ra ameyo girewtene şuxulnena û sîvîlan qetil kena. Ganî çeke û teknolîjya çekan nêdîyo rejîmê Erdoganî. Bitaybetî badê nê raporî ganî Almanya semedê qedînayîşê operasyonanê leşkerî yê Tirkîya cade têbigêro.''