Rayraşîyayîşê Dergî yê ke hetê Têrayîşê Ciwananê Şorişgêran (TCŞ) û Cinîyan ê Ciwanan ê Têkoşeran (TekoJin) ra ameyî organîzekerdene bi coşî dewam kenê.

Almanya de Rayraşîyayîşo Dergo ke perey Dortmund de ame destpêkerdene vizêr rixmê provokasyonê faşîstanê tirkan Essenî ra resa Duisburgî. Ciwanan bi sloganan xoverdayîşê gerîlayan selam kerd û azadîya Rayberê Şarê Kurdî Abdullah Ocalanî waşte. Ciwanan vilawekî vila kerdî û vera qedexeyê PKKyî îmzayî arêdayî.

Îngîlîstan de zî Rayraşîyayîşê Dergî roja xo ya verêne xo dima verdaye. Ciwanî London de rixmê şertanê hewayê xirabî bi coşî rayra şîyî û bale ante hêrişê îşxalî yê dewleta tirke ser û mesajê xurtkerdişê têkoşînî dayî.

Yunanîstan de zî ciwananê ke vizêr dest pê rayraşîyayîşê hîrê rojan kerd Kampa Lavrioyî ra resayî Marco Pouloyî. Roja verêne ya çalakîye de slogananê sey "Bijî berxwedana gerîla", "Bê Serok jiyan nabe", " Bimre xiyanet"  ameyî eştene û deyîrê şorişî ameyî vatene. Ciwanan badê rayraşîyayîşî heyatê şaredarî de konferans da.

Swîsre de zî roja verêne ya Rayraşîyayîşê Dergî bi coşî qedîyaye. Ciwanan kuçeyanê Solothurnî de derheqê şuxulnayîşê çekanê kîmyewîyan ê dewleta tirke yê vera gerîlayan de vilawekî vila kerdî. Ciwanî derheqê hêrişê îşxalî yê ke Kurdîstan de yenê kerdene tewrê semînrêkî bîyî.