TCŞ û TÊKO-JIN bi şîarê 'Vera îxanet û îşxalî bêrê cengê azadîye' roja diyîne ya Rayraşîyayîşê Dergî yê Îngilîstan, Swîsre  û Yunanîstanî qedînaye. Almanya zî roja hîrêyine xo dima verdaye.

Şaristanê Londonî yê Îngilîstanî de rixmê şertanê hewayê xirabî de ciwanan çalakîya Rayraşîyayîşê Dergî temam kerde. Girseyî deqayêkê rêzgirewtişî ra dima dest pê çalakîye kerd. Rayraşîyayîş de girseyî mekapê gerîlayan wedaritî û sloganê sey 'Biciwîyo gerîla' vatî. Rayraşîyayîş de fotografê Rayberê Şarê Kurdî Abdullah Ocalanî, flamayê TCŞyî ameyî akerdene, hêrişê îşxalî ameyî protestokerdene. Ciwanan rayraşîyayîş Parka Hyde de qedînaye, tîya de vilawekê serê hêrşanê îşxalî û sûcanê dewleta tirke vila kerdî. 

Şaristanê Atina yê Yunanîstanî de ciwanan Marco Poulo de dest pê Rayraşîyayîşê Dergî kerd û  şan resayî Palania. Rayraşîyayîş de fotografê Rayberê Şarê Kurdî Abdullah Ocalanî, flamayê TCŞyî ameyî akerdene, bi sloganan paştî ameye dayene gerîlayan. Ciwanan Salona Tîyatroyî ya Palania de şayîyêke kerde. Şayîye bi govendan qedîyaye.

Swîsre de zî Rayraşîyayîşê Dergî roja dîyine xo dima verdaye. Ciwanan vizêr şaristanê Bielî de dest pê rayraşîyayîşî kerd û heta şaristanê Lyssî rayra şîyî. Ciwanî gama ke Seelandheim de semedê arisyayîşî vindetî tîya semînerêk ame kerdene û derheqê xeta xoverdayîşî û îxanetî de ame qiseykerdene. Ciwanî ewro do Lyssî ra ver bi Bernî rayra şirê.

Almanya de zî Rayraşîyayîşê Dergî roja xo ya hîrêyine Duisburgî de xo dima verdaye. Ciwanî ewro do heta Dusseldorfî rayra şirê û tîya fînal bikerê.