20 rojnamegerê ke 8ê hezîrane de Amed de ameyî destbendkerdene mudetê nezaratê înan 2 rojî ame dergkerdene. Hetê bînî ra rojnamegerî zere ra mesajê xoverdayîşî danê û teber de zî çalakîyê paştdayîşî zêdîyenê.
Çarçeweya cipersayîşê Serdozgerîya Komere ya Amedî de 8ê hezîrane de 20ê înan rojnamegerî 21 kesî ameybî destbendkerdene. Mudetê nezaretê nê 21 kesan 2 rojî ame dergkerdene.
Dîya zanayene ke çarçeweya operasyonî de polîsan heman wextî eşt keyeyanê rojnamgeran û cayê produksiyonê Pel, Pîya, Arî merkezê Jinnewsî ser û cigêreyîş kerd. Cigêrayîşan de xeylêk malzemeyo dîjîtal ame destsernayene.
Rojnamgerê ke nezarat de yê înan ra Hemserekê Komeleya Rojnamegeran a Dîcle Firatî (DFG) Serdar Altan, Edîtorê Ajansê Mezopotamya (MA) Aziz Oruç û Omer Çelîkî bi rayîrê avûkatanê xo mesajê xoverdayîşî şawitî. Rojnamgeran vat ê do rixmê heme zextan tim raştîyan bunusê.
Hetê bînî ra semedê paştdayîşê rojnamegeran çalakîya paştîdayîşî ya bîne Amed de ameye kerdene. Hetê xeylêk partîyanê sîyasîyan û dezgehanê komelê sîvîlî ra eşkerayîye ameye dayene. Eşkerayîye de ame vengdayene ke wa rojnamegerî cade bêrê veradayene û ame vatene ke çew nêeşkeno çapemenîya azade bêveng bikero.
