'Rojnamegerî rayîrê xo ra do anêgêrê'
Komeleya Rojnamegeranê Dîcle Firatî îfade kerd ke Tirkîya de rojnamegerîye mîyanê karanê tewr bitehlukeyan de ya, tewr tay 100 rojnamegerî tepişte yê û vat: ''Rojnamegerî rayîrê xo ra do anêgêrê.''
Komeleya Rojnamegeranê Dîcle Firatî (DFG) ewro bi wesîleya 3ê Gulane Roja Azadîya Çapemenîye ya Dinya eşkerayîyêka nuştekîye daye.
Eşkerayîya DFGyî wina ya: ''Tirkîya de dewirê pêro îqtîdaran de zî rojnamegerîye tim bîye hedef yan zî sey hedef ameye mojnayene. La îqtîdarê AKPyî de teda, astengî û sansurî zaf zêdîyayî. Goreyê lîsteya RSFyî Tirkîya mîyanê 180 welatan de hetê azadîya çaepmenîye ra asta 154. de ya. Na zî eşkera kena ke Tirkîya azadîya çapemenîye ra çend kewta dûrî. Tehqîqat, teda, cezaya zîndanî, dewa, tepiştîşê vera rojnamegeran bi heman hawayî dewam kenê. Prosesê vîrusê Korona de zî rojnamegerî bîyî hedef. Eşkerayîya xo de Erdoganî seba rojnamegeran vat ke 'vîrus.' No vatişê ey zî asta tedaya vera rojnamegeran nîşan dano.
Ganî cade pêro rojnamegerê tepişteyî bêrê veradayene. Tedayî nêeşkenê ke rojnamegeran rayîrê înan ra bivisnê dûrî. Ma her wext seba raştîye gamanê xo bierzê. Bi na wesîle ma reyna roja rojnamegeran fîraz kenê. Ma reyna vanê ke ma hetê embazanê xo yê rojnamegeran de yê ke rixmê pêro tedayan wezîfeyê xo anê ca.''
Goreyê ''Raporê Binpaykerdişê Heqanê Rojnamegeran'' ê DGFyî menga nîsane de 2 rojnamegerî ameyî destbendkerdene, rojnamegerêk/e ame/ye tepiştene, vera rojnamegerêkî/e hêriş ame kerdene, derheqê 12 rojnamegeran de tehqîqat dîya destpêkerdene, derheqê 10 rojnamegeran de dewa ameye akerdene, rojnamegerêk/e yeno humkerdene, 275 keyepelê rojnameyî ameyî astengkerdene, 11 televîzyon û radyoyan rê hetê RTUKî ra cezaya weşanî dîyaye, 3 rojnamegerî karî ra ameyî vetene.
Goreyê doneyanê çele, sibate, adare û nîsane yê heman raporî mîyanê 4 mengan de 29 rojnamegerî ameyî tepiştene, 10 rojnamegerî ameyî tepiştene, vera 4 rojnamegeran hêriş ame kerdene, derheqê 26 rojnamegeran de tehqîqat û derheqê 14 rojnamegeran de zî dewa ameyî akerdene, 15 rojnamegeran rê ceza dîyaye, 277 keyepelê rojnameyî ameyî astengkerdene, hetê RTUKî ra 13 dezgehan rê cezaya weşanî dîyaye, 11 rojnamegerî karî ra ameyî vetene.
Rapor de ame vîrvistene ke zîndananê Tirkîya û Kurdîstanî de bi temamî 104 rojnamegerî tepişte yê.
