Hêrişanê kîmyewîyan ê dewleta tirke ya îşxalkere de menganê peyênan de 17 gerîlayê azadîye şehîd bîyî ke nînan ra yewe zî Rûksene Zagros (Newroze Tahîr) a.

Rûksene şaristanê serkêşê Şorişê Rojawanî Qamişlo de, Newroza 1998î dadîya xo ra bena coka keye nameyê aye Newroze nano pa. Wexto ke DAÎŞ hêrişê Rojawanî keno 2014 de verê bînaya Şaredarîya Qamişloyî de cinîyî zî tede xeylêk kesî şehîd benê û nê şehadetî zaf tesîrê Rûksene kenê. Rûksene naye ra pey mîyanê Têgêrayîşê Ciwanan ê Şorişgêran de cagêna û Newroza 2014î de zî Rimêlan de tewra gerîlayan bena.

Rûksene domanîya xo de dîmenanê gerîlayan ê cinîyan rê tesîr bena û raştîya nê cinîyan ê fedayîyan rê şahidîye kena.

Rûksene Metîna de wextêko derg gerîlatîye kena û dima derbazê Zapî bena. Zap de zî Rûksene bi enerjî û kesayetê xo serkêşîya embazanê xo kena. Rûksene bi hawayêkê aktîfî Hemleya Şorişgêre ya Bazanê Zagrosî de cagêna û hêrişanê kîmyewîyan ê dewleta tirke de teşrîna verêne ya 2022yî de Zap de şehîd bena.

Babîyê Rûksene Zagros Mihemed Tahîr û waka ci Kewsere Tahîr ANFyî rê qala Rûksene kerde.

Babîyê ci Mihemed Tahîrî pare kerd ke Rûksene domanîya xo ra nata tim kesêka jîre û bêvenge bîye la wexto ke qisey kerdêne zî bala her kesî antêne xo ser. Mihemed Tahîrî vat: ''Hêrişê DAÎŞî yê vera Şaredarîya Qamişloyî ra dima Rûksene vurîyaye, tewra xebatanê ciwanan bîye. Dadîya aye şehadetê aye ra di mengî ver hîs kerdbî ke a do şehîd biba. Rûksene têna seba ma nê seba dewaya şarê xo şer kerd. Aye na azadîye pey û xo resna ci.

Ma hêrişanê kîmyewîyan qebul nêkenê. Domanê ma têkoşînê azadîye kenê. Ê çewî rê neheqîye nêkenê û erdê Kurdîstanî de ciwîyenê. Destê kamî gonîya kênaya mi de est bo ez qebul nêkena.''

Waka Rûksene Kewsere Rûksene venga PDKyî da û vat: ''PDK rayîr dano tirkan û tirkî zî çekanê kîmyewîyan şuxilnenê. PDK senî xo rê vano kurd. 7 mengî yo vera gerîlayan çekê kîmyewîyî şuxilîyenê. Dinya verê ney de bêveng a. Ganî çew vera nê hêrişan bêveng nêmano.''

1ê Teşrîna Peyêne Roja Kobanê ya Dinya de seba vîrameyîşê Rûksene Akademîya Komelê Demokratîkî de termînê perwerdeyî yê Şehîde Newroze Tahîr dîya destpêkerdene.