Hemserekê Pêroyî yê HDPyî merkezê partîya xo de kombîyayîşanê hemserekan de qisey kerd û rojdem ercna.

Qiseykerdişê Sancarî ra beşêk wina yo:

''Nê weçînayîşî zaf krîtîk ê. Ganî ma bi her hawayî xo weçînayîşan rê amade bikerê. Ganî ma bi xebatanê weçînayîşî komel rêxistin bikerê.

Vera polîtîkayanê şer û yewperestî yê îqtîdarê AKP-MHPyî polîtîkayê ma azadîye, demokrasî, haştî û kede pawenê.

Reyna babetêka ke netîceya nê polîtîkayanê şerî de qewimîyaya rojdem de ya. Nê zî îdîayê şuxilnayîşê çekanê kîmyewîyan ê. Nê îdîayî pê zûran û gefan nênê pûçkerdene. Ganî heyetê xoserî şorê herême û nê îdîayan ser o cigêrayîşan bikerê. Eke nê îdîayî bêrê peygoşkerdene şer do hîna bêro girankerdene. Ma meseleya kurdan de gêrenê çareserîya demokratîke. Rayîrê çareserîya demokratîke muzakere û dîyalog ê.

Ma seba çareserîya demokratîke ya meseleya kurdan ma muracat kerd ke Birêz Abdullah Ocalanî Îmrali de bivînê. Ma seke çend reyî vatbi HDP seba pêro mesuldarîyan amade yo. Ma wazenê seba komelî rayîrê haştî û çareserîye bêro akerdene coka vindarnayîşê polîtîkayanê şerî zaf girîng o. Hukmat zî hetêkî ra wazeno Îmraliyî ser o manîpulasyonan bikero. Ma wazenê bi zîyaretê xo yê Îmraliyî verê nê manîpulasyonan zî bigêrê.

HDP partîyêka winasên a ke polîtîkayanê şefafan ser de vindena. Rayîrê vergirewtişê spekulasyon û manîpulasyonan zî wedaritişê tecrîdî yo. Ma nika pabeyê cewabê Wezîrîya Edaletî yê. Vera polîtîkayanê şerî akerdişê rayîrê haştî û çareserîye mesuldarîya HDPyî ya.''