Rêxistina HDPyî ya Îstanbulî bi şîarê ''Nika wext wextê HDPyî yo'' kongreya xo ya 4. kerde. Kongre Merkezê Kulturî yê Kuçukçekmece de ameye kerdene. Bi hezaran kesî beşdarê kongre bîyî û salone de ca nêmende. Girseyî pê sloganan azadîya Rayberê Şarê Kurdî Abdullah Ocalanî waşte.

Dima ke Koma Ma Muzîkî vejîyaye sehne ser Hemserekê HDPyî Mîthat Sancarî qisey kerd. Sancarî vat: ''Pabeyê ma bê, ma hê yenê ke zaliman, dizan, serweran birijnê. Ma do qetî birijnê. No coş û girse înan do bitersnê. HDP partîya demokrasî, azadîye, haştîye, edalet û têdûştîye ya. Ma do wextêkê nêzdî de edalet û haştîye bîyarê nê welatî.

Wa îqtîdar her roje operasyonan bikerê, ma nînan ra nêtersenê. Ma dewaya şima ya Kobanê û dewaya qefilnayîşê HDPyî pûç jerdî eştî. Embazê ma salonanê mehkeme de şima mehkum kenê. Çend rojî yo îftîrayêke nêmenda ke înan ma rê kerda. Ê wazenê Cizîre têmîyan bikerê, welat de kaos virazê. Ma do komployo ke Soyluyî Cizîre de amade kerdo, birijnê.  Wa îqtîdar verî şoro hesabê dizdîye û mafyayan biperso.

Înan de têna dek û dolabî mendî. Hêzê înan nêmendo. Xeta ma ya hîrêyîne her roje bena pîlêr û bihêzêr. Ma do nê welatî nê îqtîdarî ra bixelisnê. Ma do peynîya nê sîstemî bîyarê û îqtîdarî bivurnê. Ma dek û dolabî bin kerdî, ma do qetî ser bikewê.''