Wekîla HDPyî ya Agirî Dîrayete Dîlan Taşdemîr ANFyî rê polîtkaya hêrişkare ya hukmatî ya vera zîndanan ercnaye.

Taştemîre vat: ''Zîndananê Tirkîya de çirey rewşe zelale û goreyê heqanê merdiman nîya.  Nê demê peyênî de rewşe xirabere bîya. Caardişê ke nînê tarîfkerdene zîndanan de yenê kerdene.  Hema hema pêro zînanan da eynî caardişî têdima yenê kerdene. Na polîtîkaya zextî ya sîstematîk a. Nê zextî têna hetê îdareyê zîndanî rê nînê kerdene. Polîtîkaya hukmatî ya. Polîtîkaya zextî ya ke teberde semedê teslîmgirewtişê komelî yena rayraberdene zîndanan de dahîna giran a. Heme heqê esasî yenê xespkerdene û tepişteyî mecbûr vera na rewşe xover danê.

Xeylêk heqê tepişteyanê ke qanûn de ca genê bi caardişanê keyfîyan yenê binpaykerdene. Bîlasebeb şinê tepişteyan ser û gama ke tepişteyî vera neheqîye vejîyenê raştê şîdetî yenê. Nika zereyê zîndanî de yew mehkeme veta. Mehkeme xora ceza dana tepişteyan la Heyetê Çimdarîyê Înfazî yê Zîndanî reyna mehkeme nano ro. Tepişteyê ke 30 serrî zîndan de mendê înan ra persenê vanê; 'şima endamê rêxistine yê?' Gama ke cewabê ke wazenê nêgenê înan sey rehîn tepiştene. No çîyêko keyfî yo. Îqtîdar wazeno tepişteyanê sîyasîyan ra qesas bigêro.  Her çî pê peran roşenê. Hela ke merdimê înan pere şawenê zî nê sey 'paştdayîşê rêxistine' hesibnenê û ceza danê. Çîyê ke qewimîyenê famkerdişê ci zehmet o.

Goreyê zanayîşanê ke merdimanê tepişteyan daye ma. Tay kesê sîvlî yê ke personelê zîndanî nîyê vejîyayî werte.  Tepişteyan rê îşkenceyê sey bizorî humartişî kenê. Ma nê wezîrîye ra persayî la game nêerzîyena.  Îdareyê zîndanî ma reyde pêvînayîş nêkenê. Eke ma pêvînayîş bikerê îşkence vejîyeno werte. Ganî  ma sey partîyanê sîyasîyan û rêxistienanê komelê demokratîkî wayîrê tepişteyan vejîyê. Rêxistinê heqanê merdiman û baroyî ganî zaf naye ser o vinderê. Ganî ma nê vejê werte.''