Wekîla HDPyî ya Muşî Gulîstane Kiliç Koçyîgît derheqê tecrîdê serê Rayberê Şarê Kurdî Abdullah Ocalanî de ANFyî rê qisey kerd.

Koçyîgîte ard ziwan ke tecrîd çarçeweya konsensusê mîyanneteweyî de yeno domnayene û vat: ''Tecrîd zî sey Komployê 9ê Teşrîna Verêne  caardişêkê mîyanneteweyî yo. Coka Konseya Ewropa û CPT vera ci çîyêk nêkenê. Ma yew proses de yê ke Yewîya Ewropa, Neteweyê Yewbîyayeyî, Parlamentoyê Ewropa tesîrê xo vînî kerdo. Caardişê vera Abdullah Ocalanî sey leteyêkê konseptê mîyanneteweyî bi zanayîş yenê kerdene. CPTyî raporê xo yê 2019î  serra 2020î de eşkera kerd. Rapor de ard ziwan ke qedexeyê avûkat û keyeyî nîno qebulkerdene û vat ganî Tirkîya gamêke bierzo la Tirkîya qet gamêke nêeşte. Rixmê naye qet nêşîyî Tirkîya ser. Nê pêroyî netîceya nêzdîbîyayîşê sîstemê mîyanneteweyî yê vera Abdullah Ocalanî yo. Wazenê ke o tim Îmrali de binê tecrîdî de bimano.''

î Gulîstane Kiliç Koçyîgît vat: ''Cezaya muebetî zî bibo ganî wextêkî ra dima ganî çew zîndanî ra vejîyo. Ganî tehlîyeyo bişert ya zî mekanîzmayê bînî yê tehlîye bikewê dewre. Eke qala Abdullah Ocalanî bêro kerdene na mesele dahîna bena hesas û xorî. Şarê kurdî ey sey Rayberê xo vîneno û bi îmzayanê xo mojneno ke ey sey îradeyê xo vîneno. Abdullah Ocalan semedê meseleya kurdî mefteyê çareserî yo û semedê çareserîya demokratîke kede dano û sereyê xo dejneno. Tecrîdê serê Abdullah Ocalanî sûcê îşkenceyî yo. Tirkîya hem qanûnanê xo hem zî qanûnanê mîyanneteweyî binpay kena. Pê azadîya Abdullah Ocalanî meselaya kurdî eşkena bêro çareserkerdene. Tecrîdê serê Abdullah Ocalanî ewro heme welatî ra vila bîyo. Kam ke welat de demokrasî û azadîye wazeno ganî vera tecrîdî bêveng memano. Semedê Tirkîyaya demokratîke ganî tecrîdê Îmraliyî bêro wedaritene û heme heqê Abdullah Ocalanî ci rê bêrê îadekerdene.''