Pandemîya Covid-19î dinya de bena sebebê mergan. Îqtîdarê AKP-MHPyî zî terefgîrê xo, cerg û îstîsmarkerî vera dayî la tepişteyê nêweşî vera nêdayî.

Necdet Abîyo ke Zîndanê Wanî de tepişte yo bi rayîrê waya xo Merale Abî vat: ''Tîya de asayîşê canê ma çin o.''
Abdullah Orhano ke Zîndanê Wanî de maneno, bi rayîrê cinîyan xo Zekîye Orhan vat: ''Warê werd, şimitiş û pakîye de averşîyayîşêk çin o.''

Tepişteyê nêweşî Nesîmî Kalkano ke tede nêweşîya çolyakî esta û Zîndanê Şirnexî de maneno vat: ''Bi rojan o ke werdê bêgluten nêdanê mi.''

Nazline Solguna ke Zîndanê Kayserî de manena îfade kerd ke 3 hewteyan ra nata qirik û çimê aye dejenê la nêwedarîyaye nêweşxane. Solguna ke 2 embazanê xo reyde kanrantîna de ya vat: ''Dozger û mudirê zîndanî nêwazenê ke mi rê testê vîrusê Korona bêro kerdene. Nêverdenê ma keyeyanê xo reyde qala meseleyan bikerê.''

Zîndanê Metrîsî ra 3 tepişteyê astengdarî mîyanê şertanê bêmerdimîye de yê. Sedal Yildirim se ra 98 astengdar o, Abdullah Turhan felç o, Engîn Aktaş zî destêkê ci çin o û tede nêweşîya weremî esta. Dezgehê Tipê Edlîyî 5 reyî raporî amade kerdî Aktaş nêeşkeno zîndan de bimano la bi bahaneya ke bêno ke biremo Aktaş vera nêdîyeno.