Wekîlê Partîya Çep a Keske yê Êlihî Mehmet Ruştu Tîryakîyî ANFyî rê qisey kerd ke weçînayîşê 14 û 28ê gulane serê dişmenîya kurdan ameyî kerdene. Tîryakîyî vat: ''Nê weçînayîşî asta tarîxîyî de girîng bîyî.''

Tîryakîyî da zanayene ke prosesê weçînayîşî bi fînansmanêkê neheqî, bi ambargoyê çapemenîye û rejîmê Rewşa Îstîsnayîye vîyarto. Tîryakîyî vat: ''Heyf ke verê Tirkîya, Kurdîstan û Rojhelatê Mîyanênî de ameyoxêko rind çin o. Bawer bikerê ke eke ma vera nê polîtîkayanê nîjadperest, dişmenê cinîyan û şerî têkoşîn nêkerê hîna zaf do bikewê binê şer û xizanîye. Ma sey partîye weçînayîşan qij nêvînenê. La ma zanenê ke teyna pê weçînayîşan meseleyî çareser nêbenê. Coka weçînayîşan ra ber ma têkoşînê komelkî kerd merkezê sîyasetê xo. Beno ke sebebê tewir û nêzdîbîyayîşêkê hêrişkerî yê vera ma no yo.''

Tîryakîyî pare kerd ke hemserek û hemvervatoxê înan hêverî kom bîyî, dima ê do partîyanê bînan ê îtîfaqî de kombîyayîş bikerê, dima endamanê Meclîsê Partîye de nîqaş bikerê. Tîryakîyî vat: ''No proses û nîqaşî do pêro kombîyayîşanê ma yê Heyetê Îdareyê Merkezî de bêrê kerdene. Goreyê nê nîqaşan ma do pêro şaristan û qezayan de kombîyayîşanê şarî bikerê. Ma do rexne û pêşnîyazanê rêxistinan û şarê xo bigêrê. Têgêrayîşê ma rexnekerdiş û rexnedayîşî seba xo sey metodêkê cuye vîneno. Ma do nê prosesî rê dewam bikerê. Wa kes nêqerqilo. Ma do têkoşînê demokrasî pîl bikerê. Sere de Meclîs de ma do her ca de nê têkoşînî pîl bikerê. Ma do şarê xo bêhêvî nêverdê.''