25ê hezîrane de saristanê Dusseldorfî yê Almanya de semedê protestokerdişê hêrişê îşxal û  qirkerdişî yê dewleta tirke, serkêşîya Defend Kurdîstanî de çalakîya merkezî bo bêrokerdene.

Têgêrayşê Cinîyan ê Kurdan ê Fransa (TJK-F) bi eşkerayîyêke venga her kesî da ke 25ê hezîrane de tewrê mîtîng û rayraşîyayîşê Dusseldorfî bibo. TJK-Fyî eşkerayîya xo de bale ante xoverdayîşê gerîlayan ser û vat: ''Cinîyê kurdî, şarê ma ganî seba rayraşîyayîşê Dusseldorfî seferber bibê û biherikê Dusseldorfî. Ma reyna vera qirkerdişê dewleta tirke vengê xo berz bikerê.'' Endamanê cinîyan ê TJK-Fyî îfade kerd ke çalakîya Dusseldorfî îlankerdişê îradeyê Kurdîstanî yo.  

Federasyonê Şaranê Kurdîstanî yê eyalatanê Bayern û Baden Wurtembergî yê Almanya (FED-GEL) zî eşkerayîya xo de wina vat: ''17ê nîsane ra nata Zap, Metîna û Avaşîn de hêrişê qirkerdişî û îşxalî dewam kenê. Gerîlayî vera nê hêrişan xoverdayîşêkê tarîxîyî kenê. Dewleta tirke seba ke gerîlayan çin bikera çeka kîmyewîye şuxilnena. NATOyo ke bîyo rêxistina dişmenê kurdan, verê îşxalê dewleta tirke yê serê Rojawanî akeno. Seba ke verê nînan bigêrê ma venga her kesî danê ke 25ê hezîrane de tewrê rayraşîyayîşê 'Kurdîstanî Bipawê' yê Dusseldorfî bibê.''