Avûkata Rayberê Şarê Kurdî Abdullah Ocalanî Newroze Uysala ke ANHA rê qisey kerd ard ziwan ke Qerarê Konseya Ewropa do Tirkîya ser tesîr bikero.

Uysale vat: ''Mehkemeya Heqanê Merdiman a Ewropa qerar girewt ke Îmrali de binpaykerdişê heqan esto û Tirkîya ra waştbi wa nê şertan bibedilnê. La heta ewro Tirkîya çîyêk nêkerd. Karê Komîteya Wezîran a Konseya Ewropa oyo ke nê qereran teqîp bikero û şirê dewletan ser ke ê nê qeraran bîyarî ca. Qerarê Birêz Ocalanî de 2014î ra nata destê na komîte de yo. Pîya Birêz Ocalanî hîrê kesê bînî estê ke MHME semedê înan gerar girewto. Ewro Tirkîya de bi hezaran kesî cezaya muebetê giranî rê rî bi rî yê. Ganî no werte ra bêro wedaritene. Badê 7 serran Komîteya Wezîran a Ewropa no girewt dest. Coka no muhîm o. Ma nê qerarî sey heqê hêvî hesibnenê. Tepişteyî ganî hêvî bikerê ke ê rojêke eşkenê vejîyê teber. Tepişteyê ke cezaya muebetê giranî girewta hewce nêkeno heta mergê xo zîndan de bimanê. Ganî yew mekanîzma bibo ke rewşa înan teqîp bikero.

Goreyê mehkeme ganî no mekanîzma heme welatan de bibo la dewleta tirke no semedê cezayanê muebetî qebul nêkerd. No qerar semedê Birêz Ocalanî ame girewtene la ewro bi hezaran kesî na ceza ancenê. Seba ke Birêz Ocalan azad nêbo dewlete qanûnan nêbedilnena. Birêz Ocalan semedê komelê kurd û tirkî hêvî yo. Muxatabê haştîya komelkîye yo. Hinî rewşe ameye yew hale ke ma nêzanê Birêz Ocalan ho Îmrali de yo ya nê. Ma weşîya ey qesewet kenê. 6 mengdan de hey cezaya dîsîplînî yena dayene. Nika nêrazîbîyayîşê vera tecrîdê serê Birêz Ocalanî zaf zêdîyayî. Ma zanê ke nêrazîbîyayîşê vera tecrîdî û wayîrvejîyayîşê Birêz Ocalanî eşkenê beran abikerê.''