Kongreya Demokratîke ya Şaran (HDK), HDP û Hêzanê Têkoşînî yê Yewbîyayeyan (BMG) bînaya HDPyî ya Îstanbulî de bi eşkerayîyêka çapemenîye da zanayene ke 6ê teşrîna peyêne de 'Rayraşîyayîşê Merdimîye yê vera Çekanê Kîmyewîyan' do bêro kerdene.

Wekîla HDPyî ya Îzmîrî Serpîle Kemalbay zî kombîyayîş de qisey kerd û vist vîrî ke 17 gerîlayê HPGyî pê çekanê kîmyewîyan şehîd bîyê. Kemalbaye vat: ''Tirkîya Peymana Cenevre binpay kerde. Îqtîdarê AKP-MHPyî pêro sûcdarîyan red keno, kesanê ke na babete de qisey kenê hedef keno. Eke îqtîdar hende pê xo bawer o wa heyetê xoserî şorê herême de cigêrayîş bikerê.''

Kemalbaye bale ante ser ke cigêrayîşê tay heyetan hetê PDKyî ra ameyê astengkerdene û vat: ''Astengîya Îdareyê Herêmî yê Kurdîstanî bîye sebebê hêrs û şikî. Ganî îdareyê herêmî destûrê cigêrayîşî bido û mebo şirîkê sûcan. Ganî sere de OPCW, Neteweyê Yewbîyayî, Rêxistina Weşîye ya Dinya û Yewîya Ewropa vera nê hêrişan têbigêrê. Roje roja bêvengîya nê roja pawitişê merdimîye ya. Ma venga partîyan, dezgehan, rêxistinan, şaran û merdiman danê ke wa têbigêrê. Nê esasî ser o ma 6ê teşrîna peyêne de Taksîm de rayraşîyayîşêkê haştîye bikerê. Ma venga şarê xo û hêzanê demokrasî danê ke beşdarê na çalakîye bibê. Pê bêvengîye mebê şirîkê sûcî.''