Vengdayîşê HDPyî ser o Partîya Kede (EMEP), Partîya Têgêrayîşê Kedkarî (EHP), Halkevleri, Federasyonê Meclîsanê Sosyalîstan (SMF), Partîya Karkeran a Tirkîya (TÎP) û Partîya Azadîya Komelkîye (TOP) vera kolonyalîzm û rijîyayîşê ekonomî kampanyayêka hempare ya bi nameyê 'Ma do heqanê xo bigêrê, wa meaşî bêrê zêdekerdene' daye destpêkerdene.

Kampanya qezaya Şîşlî ya Îstanbulî de bi kombîyayîşêkê çapemenîye dîyaye destpêkerdene.

Endama Meclîsê Partîye ya TOPîş Nîlaye Kuş eşkerayîye wende. Kuşe ard ziwan ke îqtîdar faturaya krîzê ekonomîkî şarî rê birneno û şar hînî nêeşkeno hewcedarîyanê xo yê serekeyan peyda bikero. Kuşe îfade kerd ke înan seba cuyêka rûmetêne na kampanya daya destpêkerdene û çarçewa kampanya de tay aktîvîte û çalakîyan bikerê. 

Kuşe vat: ''Seba ke ma heqê xo û meaşê qîmî bigêrê têkoşînî war meverdê. Ma venga pêro şar, partî, rêxistinanê demokratîlan û rayaumûmîye danê ke wa ma reyde tewrê kampanya bibê û têkoşînî pîl bikerê.'' 

Hemsereka HDPyî ya Îstanbulî Îlknure Bîrol zî dîyar kerd ke ê armanc kenê ke na kampanya şarî reyde bikerê û vat: ''Ma do vilawekan vila bikerê, kampanyaya îmzayan bikerê, pankartan bidaliqnê. Ma çarşeme Kadikoy, pancşeme Şîşlî verê Cevahîrî û roja îneyî zî Meydanê Bakirkoyî de standan abikerê û 39 qezayanê bînan de zî nê xebatan bîyarê ca.''

Sereka EMEPî ya Îstanbulî Sema Barbaros zî bale ante ser ke heta ke destê înan ra bêro ê do kampanya biresnê her cayî.