Operasyonanê serê HDP, HDK û GOÇÎZ-DERî de 10 qezayan de bi desan kesî ameyî destbendkerdene. Wekîlanê HDPyî Gulîstane Kiliç Koçyîgît û Serpîle Kemalbay derheqê bira dewaya qefilnayîşê HDPyî û operasyonanê sîyasîyan de ANFyî rê qisey kerd.

Wekîla HDPyî ya Îzmîrî Serpîle Kemalbay îfade kerd ke operasyonê vera înan bi hawayêkê sîstematîkî dewam kenê û vat: ''Seba ke weçînayîş beno nêzdî operasyonê winasênî zêdîyenê. Îqtîdarê AKP-MHPyî pê nê operasyonan keno ke cayê xo zixm bikero û îqtîdarê xo medo. Îqtîdar wazeno HDPyo ke têkoşînê demokrasî keno tasfîye bikero û bi nê hawayî rayîrê xo abikero. Hetêkî ra dewaya qefilnayîşê partîya ma hetê bînî ra Dewaya Kobanê. Nê dewayî seba krîmînalîzekerdişê têkoşînê ma yê la do netîceyêke nêdê. Ganî hîna zaf wayîrê HDPyî bêro vejîyayene. Ma do vera blokê faşîstî têkoşînê xo rê bi qerardarî dewam bikerê.''

Wekîla HDPyî ya Mûşî Gulîstane Kiliç Koçyîgît vat: ''Ma nê operasyonan şermezar kenê. Eşkera yo ke nê operasyonî do dewam bikerê. La ê do nêeşkê têkoşînê ma asteng bikerê. Tirkîya de şar vera krîzê ekonomîkî nêrazîbîyayîşê xo berz keno. Îqtîdar seba ke ney binimno hêrişê ma keno. Îqtîdar ho seba qezençkerdişê weçînayîşî zî hetêkî ra hêrişê Rojawan û Başûrê Kurdîstanî keno. Wa kurdî, elewîyî, muaxalefet û pêro beşê komelî vera nê tedayan bêveng nêmanê. No konseptê hêrişan dewamê konseptê 2015î yo. Îqtîdar se keno wa bikero do nêeşko verê xoverdayîşê ma bigêro. Hêrişê îqtîdarî nê xoverdayîşê ma do ser bikewo.''