Şaristananê Sine, Urmiye, Kirmaşan, Qesirî Şirîn, Seqiz, Merîwan, Mahabad, Bokan, Serpêl Zehaw, Miyanduav û Brûcêrdî û Loristan de vizêr roja 45. de serewedaritişê şaranê Îran û Rojhelatê Kurdîstanî dewam kerd.

Xeylêk taxanê Sine de ciwanan bi adirvistişî û rayîrgirewtişî nêrazîbîyayîş mojna.

Hetê bînî ra dima ke Sine de ciwanê bi nameyê Efşîn Morowetî hetê hêzanê Îranî de amebi destbendkerdene û xebera qetilbîyayîşê ci vila bîye mabênê hemwelatîyan û hêzanê Îranî de alozîye vejîyaye.

Hêzanê Îranî hêrişê keyeyanê wendekaranê Zanîngehê Sine kerd û tewr tay 8 wendekarî birîndar kerdî.

Temamîya Îranî de zî roja îneuî bi hezaran kesî vejîyayî waran. Zahidan de hêzanê dewleta Îranî şar da guleyan ver û goreyê xeberan 2ê ci domanî 3 kesî ameyî qetilkerdene û qasê 45 kesî birîndar bîyî.

Tehran, Erak, Tonêkabon, Amol, Babol, Serawan û Îranşehr de zî nawnayîş û nêrazîbîyayîşî est bîyî.

Goreyê Rêxistina Heqanê Merdiman a Îranî heta nika nawnayîş û çalakîyan de 253 kesî ameyî qetilkerdene ke nînan ra 34ê ci doman bîyî.

Vizêr Wezîrîya Îttîlaatî ya Îranî bi raporêkî îdîa kerd ke nawnayîş û çalakîyî hetê MOSAD û CIA ra yenê plankerdene û tay torrê medyaya dîjîtale zî pê plankerdişê çalakîyan sûcdar kerdî.