YJK-E 29ê teşrîna verêne de bi tewrbîyayîşê 170 delegeyan kongreya xo kerde. Kongre de ame vatene ke seba ke heme cinîyî bêrê rêxistenkerdene ganî xebatî bêrê xurtkerdene.

Delegeyanê kongreya YJK-E semedê tewrbîyayîşê çalakîyan ke Den Haag û Dusseldorf de do bêrê kerdene, veng da. Cinîyan veng da heme kurdan ke wa vera hêrişanê kîmyewîyan 1ê teşrîna peyêne de verê xo bidê Den Haagî û 12ê teşrîna peyêne de zî Dusseldorf de bêrê pêser.

Hemsereka KON-MEDî Zubeyde Zumrut û Vervatoxa TJK-E Aytene Kaplan bi nameyê delegeyan qisey kerd.

Zubeyde Zumrut ard ziwan ke înan kongre de qerar girewto ke seba ke gerîlayan rê bibê nefes do çîyo ke destê înan ra bêro bikerê û vat: ''Vera hêrişanê qirkerdişî ganî heme kurdî û dostê înan bi ruhê seferberîye tewrê çalakîyan bibê.''

Aytene Kaplan zî bêvengîya NATOyî sey paştdayîşê hêrişanê qirkerdişî yê dewleta tirke hesibna û vat: ''Ganî şarê ma her cade tewrê çalakîyan bibo, şiro dezgehanê eleqedaran ser ke wa verê hêrişanê kîmyewîyan çîyêk bikerê.''

Eşkerayîye de semedê Şebneme Korur Fîncanci zî mesajê paştdayîşî ame dayene û eşkerayîye  tîlîlîyan û slogananê serkewtişî qedîyaye.