Mabênê rayîrê Awbendê Tişrînî û bajarekê Sirînî de, vizêr saete 15.20 de hêrişê droneyê çekdarî yê dewleta tirke de kedkarê çapemenîya azade Nazim Daştan û Cîhane Bîlgîn şehîd bîyî.

Yewîya Çapemenîya Azade (Yekîtiya Ragihandina Azad-YRA) û Yewîya Çapemenîya Cinîyan (Yekîtiya Ragihandina Jin-YRJ) derheqê qetilkerdişê rojnamegeran Cîhane Bîlgîn û Nazim Daştanî de eşkerayîyêke daye.

Eşkerayîye wina ya:

''Dewleta tirke ya îşxalkere 8ê kanûne ra nata hêrişê xo yê vera Rojawan û Sûrîye zêdînayî. Rojnamegerî zî kenê ke nê hêrişan teqîb bikerê. Dewleta tirke hêrişanê xo de çapemenîye zî kena hedef.

Tewr peyên hêrişêkê barbarî yê dewleta îşxalkere de embazê ma yo rojnameger Nazim Daştan û muxabîra ANHA Cîhane Bîlgîn şehîd bîyî.

Embaza ma Cîhane 2017 ra nata Rojawanê Kurdîstanî de rojnamegerîye kerdêne. Aye seba ke raştîyanê Şorişê Rojawanî biresna şarî cepheyê verênî yê çapemenîya azade de cagirewt. A 8 serran ANHA de muxabîr bîye. Aye wextê hêrişanê tewr giranan de zî Rojawanî ra xeberî resnayî dinya. Aye rayîrê Gurbetellîye Ersoz, Gulîstane Tara, Seyîd Evran, Dilîşane Îbîş û bi seyan şehîdan teqîb kerd. A bi embazîya xo zî tim bîye nimûne.

Embazê ma Nazim qezaya Gîyadînî ya Agirî de dadîya xo ra bîyo. Ey ciwanîya xo de dest pê rojnamegerîye kerd û wextê hêrişanê DAÎŞî de zî verê xo da Rojawanî. Ey xoverdayîşê Kobanê resna dinya, Vakurê Kurdîstanî de wextê xoverdayîşê xoîdarekerdişî de Silopîya de rojnamegerîye kerde. 2016 de ey ancî verê xo da Rojawanî. Ey Efrîn, Kobanê, Reqa, Girê Spî, Şengal û Başûr de rojnamegerîye kerde. O bi kamera û qelema xo tim cayanê têkoşînî yê tewr zehmetan de bi. Ey sey rojnamegerêkê çêrî tim xebatî kerdî.

Ma hêrişê vera nê wird embazanê xo bi giranî şermezar kenê. Ma sey teqîbkeranê raştîye bi qerardarî rayîrê şehîdanê xo ra şorê, qelem û kamerayanê embazanê xo war de nêverdê. Ma venga pêro rojnamegeran zî danê ke bibê teqîbkerê Çapemenîya Azade. Ma venga pêro rojnameger û dezgehanê çapemenîye yê dinya û rêxistinanê heqanê merdiman zî danê ke vera nê wehşetî vengê xo berz bikerê.

Ma şexsê Nazim Daştan û Cîhane Bîlgîn de soz danê pêro şehîdanê çapemenîye ke têkoşînê înan berz bikerê.

Nasnameyê embazanê ma yê şehîdan wina yê:

 

Name û Peyname: Cîhane Bîlgîn

Nameyê Babîyî: Muhammed Nesîn

Nameyê Dadîye: Katibe

Tarîx û Cayê Bîyayîşî: 1996-Mîdyad
 

Name û Peyname: Nazim Daştan

Nameyê Babîyî: Mihemed Alî

Nameyê Dadîye: Zozane

Tarîx û Cayê Bîyayîşî: 1992-Gîyadîn/Agirî

 

Wa biciwîyê têkoşîn û xoverdayîşê Çapemenîya Azade!

Şehîd Namirin!''