Nobeta Azadîye ya ke 25ê nîsana 2012î ra nata hetê Înîsîyatîfê 'Rayber Apoyî rê Azadîye' ra şaristanê Strasbourgî yê Fransa de yena kerdene hewteyê 652inî de dewam kena.

Nobete no hewte çar kesê ke bajarê Cenevre yê Swîsre ra ameyî hetê înan ra ameye dewrgirewtene. Koma Cenevre de Nurettin Turgut, Hasan Inci, Ramazan Kizilkurt û Riza Çetinkaya ca genê.

Nurettin Turguto ke 34 endamanê Grûba Haştîye û Çareserîya Demokratîke ya ke 2009 de bi vengdayîşê Rayber Apoyî ameye Tirkîya, ra yew o, bale ante muhîmîya prosesî ser û wina vat: ''Çar parçeyanê Kurdîstanî de hêrişî zêdîyayî. Xora ma seserrî yo zanê ke dewleta tirke estbîyayîşê xo çînkerdişê kurdan de vînena. Ma kurdî seserrî yo xover danê.''

Turgutî qetilkerdişê rojnamegeran Nazim Daştan û Cihane Bilgin înan ke hêrişê vera Rojawanî û xoverdayîşê şarî dinya rê dayêne eşnawitene, şermezar kerd û vat: ''Ma sey şarî do çirey milê xo çewt nêkerê. Ma do xoverdayîşê xo girdêr bikerê û destur mede ke destkewteyê Rojawanî yê ke bi keda pîle ameyî destfînayene, bêrê çînkerdene. Ganî ma bibê yew û wayîrê Rojawanî bivejê.''