Qezaya Kanîreşî ya Çewlîgî de ewro saetanê serê sibayî de polîsan eşt banê Mehmet Zekî Sayakî ser. Sayak ame destbendkerdene û dima ra seba ke derheqê ci de cezaya zîndanî ya qetî est a  Zîndanê Xarpêtî rê ame şawitene.

Mehmet Zekî Sayako ke nasnameyê ci de sey 76 serre yo goreyê keyeyê ci 85 serre yo.Sayak elûla 2012yî de amebi tepiştene, nizdê serrêke nime zîndan de mend û tewlîye bi.

Muhakemekerdişî bi serran dewam kerd û rixmo ke derheqê Zekî Sayakî de kanitê qetî çîn ê bi vatişanê şahîdê nimteyî bi sûcdarîya ''endamîya rêxistene'' cezaya 6 serran û 3 aşman dîyaye Sayakî.

Lajê Sayakî, Hîkmet Sayakî vat babîyê ci  xeylê nêweşîyê giranî yê cîya cîyayî est ê û vat babîyê ci bîlasebeb ame tepişene û gerek cade serbest bêro veradayene.