Federasyonê Komeleyanê  Paştdayîşê Keyeyanê Tepişteyan  (MED TUHAD-FED) derheqê rewşa peyêne ya zîndanan de eşkerayîyêke daye. Eşkerayîye de bale ameye antene serê hîşyarîya Rêxistina Weşîye ya Dinya ser û ca dîya nînan:

''Hukmatî kesê ke zirar danê şarî zîndanan ra vetî û tepişteyê sîyasîyî yê ke xizmetê şarî de bî mergî rê caverdayî. Cayê nê caardişî nê qet dînêk de ne huquq de ne zî merdimîye de esto. Hukmat vano ke înan semedê zîndanan vera janê Korona tedbîrî girewtî la raştîye de çîyêko winayên çîn o, şarî xapînenê. Rêxitinanê weşîye bi tim vanê  sere de extîyar, nêweş û domanî tepişteyî binê rîskê  pîlî de yê. La rixmê naye semedê tepişteyan çîyêk nêno kerdene û heqê nînan yenê binpaykerdene û şertê cuya yê înan her roje hîna yenê çetinkerdene.

Goreyê xeberanê peyînanê ke ma girewtî Edîrne de tepişteyê nêweşî nêweşxane ra bê tedawîkerdiş peyser ameyî berdene zîndan. Bolu de problemê pakîye esto, odayî qîykerde nênê dezenfektekerdene. Sîlîvrî de tepişteyê nêweşî cayêko xirabin û bêhawa de manenê. Akhîsar de zî sey xeylêk zîndananê bînan kantîne de çî-mî zaf vay roşîyeno. Reyna zîndananê bînan de zî heqê bingeyênî ye tepişteyan yenê binpaykerdene û tepişteyî raştê zext û îşkenceyî yenê.''