Suleyman Saçalo ke 26ê kanûna 2019î de Zîndanê Osmanîye ra sewqê Zîndanê Turkoglu yê Gumgumî ame kerdene dima ke kincê ci ameyî vetene hetê leşkeran û polîsan ra qasê 15 deqayan ame derbkerdene.

Babîyê Suleyman Saçalî Nîyazî Saçalî îfade kerd ke lajê ci bêzanayîşê înan ame sewqkerdene û wexto ke waya Suleyman Saçalî şîye Zîndanê Osmanîye ke birayê xo de bivîna pê rewşe hesîyaye. Dima ke Nîyazî Saçalî wexto ke lajê xo Suleyman Saçalî de bi rayîrê telefonî qisey kerd lajê ci ci rê qala îşkenceyî kerde.

Babî Nîyazî Saçalî vat: "Wexto ke lajê mi berd bi Zîndanê Gumgumî leşkeran û polîsan kincê ci vetî û qasê 15 deqayan bi kolîyan da lajê mi ro. Verî lajê mi berd bi hucre, dima berd bi koxuşî. La koxuşê 2 kesan de 3 kesî manenê. Tepişteyan seba ke koxuş pakî bikê hacetê pakîye waştî la îdareyê zîndanî nêdayî ci. Kincê lajê mi yê ke zîndanê bînî ra ardbî nêameyê dayene ci."

Suleyman Saçalî rê nê îşkenceyî ra dima qasê 4 menga pêvînayîş ame qedexedayene. Babî Nîyazî Saçalî venga rayaumûmîye, pawitoxanê heqanê merdiman û wekîlan da ke cade îşkenceyê zîndanan bêro wedaritene.