Rayber Apoyî 27ê sibate de vengdayîşo tarîxî kerd û cade dima ra  PKKyî cewab da ci û da eşnawitene ke înan 1ê adare ra nata adirbirnayîş îlan kerd.

Endamê Konseya Rayberdişî yê KCKyî Zubeyir Aydarî derheqê vengdayîşê Rayber Apoyî de cewab da persena ANFyî. Erjnayîşanê Aydarî ra qismêk wina yo:

''Verî bi heyetê hukmatî û bi nameyê dewlete heyetêk Rayber Apoyî reyde pêvînayîşî kerdî. Nê prosesê pêvînayîşî xeylê kerd derg. Nê demî de nuşte nêbo zî tay babeten de hetan pêkerd. Ez goreyê tecrubeyê xo yê 32 serran eşkena vajî ke; Rayber Apo prosesanê winayênan de çirey xo ver wina eşkerayîyan nêdano la eke firsetêk bivîno tim semedê haştîye wina eşkerayîyan dano.

Na mesele verî ra ameye plankerdene û hazirkerdene. Heyeto ke şi Îmrali Bahçelî de zî ronişt meseleyan ser qisey kerd. Xora heyetî bi zanayîş û tesdîqkerdişê Erdoganî şiyênî Îmraliyî û dima ra rapor dayenê ci. Ma nê tradîsyonê dewlete zanê. Vendayîşê Rayber Apoyî eslê xo rê dewlete rê ame kerdene. Nika top warê dewlete de ya. Rayber Apoyî venga rêxistine dayo la vato eke sîyaseto demokratîk û zemînê huqûqî bêro pêardene nînan bikerê. Coka muxatabê nê dewlet a

Ma vajê PKKyî çeke na ro. Înanê ke çeke na ro ganî sera şirê? Çi bibo? Zemînê nê yo huqûqî est o? Merdimê ke zîndan de yê ê sebenê? Rewşa Rayber Apoyî sebena? Ganî Rayber Apo demê kilmî de bikewo dewre. No bi yew eşkerayîye nêbeno, bi heyetî nêbeno. Ganî operasyonî bêrê vindarnayene.

Bahçeliyî eşkerayîye daye la hinî bi mesajan nêbeno. Ganî zereyê mesele bêro dekerdene. Xerîtaya rayîrî hewce kena. Senî ke Rayber Apoyî zî vat ganî mesele cade bêro çareserkerdene. Eke bibo derg dînamîgê darbe do verê ci bigîro. Coka ganî meclîs cade bikewo dewre. Ganî heme partîyan û dezgehanê komelê sîvîlî ra komîsyonêk bêro ronayene û prosesî bêro rayraberdene. Na mesele têna meseleya çekanê destê PKKyî nîya. Heta ke meseleya kurdan çareser mebo, çeke bêrê ronayene zî çekî yewna qeyde kewnê dewre.

Rayber Apo heta ke fîrkê rêxistine meperso game nêerzeno; do pîya qerar bigîrê hema game bierzo. Rayber Apo mesele dahanî hîra geno dest. Heme kurdan keno tewr. Coka heyet şi Başûrê Kurdîstanî. Prosesê verê ma de ganî dewlete îmkan bido. Xora no waştişê Rayber Apoyî yo; rêxistine reyde do pêvînayîş bikero. Ganî ri bî ri pêvînayîş bikero. Wa şarê ma û dostê ma rehet bê. Rayber Apo û rêxistina ci zanê ê sekenê. Nika mesele a ya ke rayîrê sîyasetê demokratîkî bêro akerdene.''