Çalakîya nobeta ke vera tecrîdê serê Rayberê Şarê Kurdî Abdullah Ocalanî û binaykerdişê heqan ê tepişteyan paytextê Almanya Berlin de ameye destpêkerdene, roja 9. de dewam kena.

Çalakîya ke endam û temsîlkarê ATÎK, CÎK, Meclîsê Cinîyan ê Dest-Dan, Meclîsê Kurdistanijanê Azadan, Komeleya Rojawanî ya Berlinî û Meclîsê Cinîyan ê Êzidîyan paştî danê ci bi rêzgirewtişî dest pêkerde.

Endamê CÎKî û meleyê camîya Mezopotamya ard ziwan ke mazlûmî heta ke vera zalîmî yew mebê û têkoşîn mekerê ê zî zulmê zalîmî ra berpirsîyar ê.

Hemserekê KON-MEDî Tahir Koçerî zî xoverdayîşê tepişteyan selam kerd û vat: ''Mazlûm Doganan ra heta Çaran, Kemal Pîran ra heta Xeyrî Dûrmûşan têkoşîn dewam keno. Ma zî tîya ra vanê waştişê tepişteyan waştişê ma yê û gereka bêrê caardene.''

Parlamenterê Die Linke yê Berlini Hakan Taşî zî ard ziwan ke gereka tepişteyê sîyasîyî yê ke zîndananê Kurdîstan û Tirkîya de yê bêrê veradayene. Taşî vat: ''Gereka ma pêro pîya vera dîktatorîya Erdoganî têkoşîn bikerê û waştişê tepişteyan bi vengê berzê bîyarê ziwan.''

Badê qiseykerdişan hunermendo kurd Hozan Aydinî deyîra ''Mîrê Mîranî'' vate. Çalakîye de sloganê sey ''Wa biciwîyo Serek Apo'', ''Hoch die İnternationale Solidaritat'' ( Paştdayîşê mîyanneteweyî berz bikerê) û ''Wa biciwîyo xoverdayîşê zîndanan''  ameyî eştene.