Komîteya Perwerdeyî ya Koma Civakên Kürdistan (KCK) bi eşkerayîyêka nuştekîye Roja Ziwanê Kurdkî fîraz kerd û nê pare kerdî:

''Bitaybetî seserra peyênê de şarê kurdî hem fîzîkî hem zî hetê ziwan û kulturî qirkerdişanê zaf girdan de rî bi rî mend. Netewe-dewletî estbîyayîşê kurdan xo rê sey tehdîtî dî û seba ke nê 'tehdît'î binate ra wedarê vera kurdan polîtîkayê qirkerdiş, asîmîlasyon û helnayîşî rayra berdî. Çar leteyanê Kurdîstanî de şarê kurdî ratşê qirkerdişî ame û ame waştene ke ziwano tewr kahan ê şarê tewr qedîmî yê Mezopotamya bêro çînkerdene.

Şarê kurdî serkêşîya Rayber Apoyî de wirişt payan ser

Şarê kurdî semedê pawitişê estbîyayîşê xo têkoşînê bêhempa rayra berdî û bedelê zaf girdî dayî. Bitaybetî Vakurê Kurdîstanî de serkêşîya Rayber Apoyî de şaro ke newe ra wirişt payan ser merg û kefen dirna. Serkêşîya PKKyî de bi keda bi hezaran şehîdan semedê azadîya Kurdîstanî  estbîyayîşê şarê kurdî girewt binê asayîşî. Têgêrayîşê Azadîye yê Kurdîstanî wezîfeyê xo yê pawitişê ziwan, kultur û estbîyayîşê kurdan bi serkewtişî ard ca. Têkoşînê estbîyayîş û azadîye kewt merhaleyêka newî.

Ziwanê kurdkî ziwanan tewr kahan û zengînan ra yew o. Bi seserran vera zextan xover da. Ehmedê Xanî, Feqiyê Teyran, Melayê Cizîrî, Celadet Elî Bedirxan û xeylê dengbêj, şaîr, nuştox û roşnvîran bi esaranê xo şarê kurdî rê mîraso edebî yo bêhempa yê fekî û nuşte verda.

Kenê ke kurdkî çîn bikerê

Çînkerdişê ziwananî sûco tewr pîl ê merdimîye yo. Ziwanê kurdkî hema zî sey fermî nîno qebulkerdene. Bi metodanê cîya cîyayan û polîtîkayê asîmîlasyonî zextê vera kurdkî dewam kenê. Kenê ke ziwanê kurdkî pede pede bihelnê û çîn bikerê.

Ziwanê ma erjê ma yo bimbarek o

Ziwanê kurdkî ruhê kurdan o. Ziwanê ma estbîyayîşê ma yo, erjê ma yo tewr bimbarek o.  Kultur û tarîxê ma çînbîyayîşî ra ameyî xelisnayene. Dişmen seba ke kurdan çîn bikero verê hêrişê ziwanê ci keno. Hema zî Kurdîstan de polîtîkayê helnayîş û  asîmîlasonî dewam kenê. Hema zî qedexeyê vera kurdkî est ê û ziwanê kurdkî hema zî nêbîyo ziwanê perwerdeyî yo fermî.

Rayber Apo averşîyayîşê ziwanî sey sewîyeya averşîyayîşê cuye hesineno û wina vano: 'Komelêk çend sewîyeya ziwanê xo yê dayîke aver bêro, sewîyeya ci ya cuye hende aver şina.'  Averşîyayîşê sewîyeya cuye û berzkerdişê ci pabesteya azadîya heme erjanê şarê kurdî û Kurdîstanî ya.

Heqê perwerdeyê kurdkî heqo meşrû yo

Seba ke kurdkî bibo ziwano fermî û ziwanê perwerdeyî gerek têkoşîn bêro xurtkerdene. Ziwan beden o, kultur beden o; ma wayîrê bedenê xo bivejê. Gerek ma vera qirkerdişê kulturî hîşyar bi. Ma bizanê ke pawitişê ziwanî vervejîyayîşê asîmîlasyonî yo, pawitişê kulturî û Kurdîstanî yo. Her netewe bi ziwanê xo est a. Darî senî bi pelê xo  zergûn benê şarê kurdî zî do bi ziwanê xo xurt bibo. Heqê perwerdeyê kurdkî heqê meşrû û esas o. Gerek her kes wayîrê nê heqî bivejo û seba ke kurdkî bibo ziwanê perwerdeyî têkoşîn bêro xurtkerdene.

Şarê Kurdîstanî rê fîraz bo

Bi wesîleya 15ê Gulane Roja Ziwanê Kurdî ma şehîdanê Kurdîstanî bi mînetî yad kenê. Ma reyna veng danê şarê xo ke wa wayîrê kurdkî bivejo, qijanê xo rê kurdkî bidê musnayene û dewaya ziwanî rê sey dewaya neteweyî wayîr bivejo.

Ma sey Komîteya Perwerdeyî ya KCKyî Roja Ziwanê Kurdkî heme şarê Kurdîstanî, kedkar û pawitoxanê ziwanê kurdkî rê fîraz kenê.''