DAÎŞijê ke Îdareyê Xoserî teslîmê Almanya kerd înan ra têna yew dekewtişê Almanya de ame destbendkerdene. Rixmê protokolê teslîmkerdişê DAÎŞî zî selahîyetdaranê Almanya Îdareyê Xoserî ra behs nêkerd.
20ê kanûne de mabênê Îdareyê Xoserî yê Rojawan û heyetêkê Almanya-Fînlandîya de protokolêk ame îmzakerdene. Çarçewa protokolî de 3 cinî û 12 domanê keyeyanê DAÎŞî Almanya rê 2 cinîyî û 6 domanî zî Fînlandîya rê ameyî teslîmkerdene.
Almanya têna înan ra yew cinîye bi sûcdarîya kiştişê êzidîyan tepişte. Wezîrê Karanê Teberî yê Almanya Heiko Maasî eşkerayîya mesele de nameyê Îdareyê Xoserî nêard ziwan û têna vat: ''Operasyon ni hetkarîya hêzan ê heremîyan ame kerdene.''
La eşkera bi ke seba teslîmê DAÎŞijan Hetkarê Sersefirê Almanya yê Hewlêrî Sven Krauspe û Îdareyê Xoserî roja pancşemeyî protokolêk kerd.
Heta pêvînayîşê nê wird heyetan de babetê pêvînayîşanê Cenevre, kongreya MSDyî zî ameyî ercnayene.
Hemsereka Dayîreyê Karanê Teberî yê Îdareyê Xoserî Danya Remedan û Endamê Buroyê Karanê Teberî Îbrahîm Selacî derheqê kombîyayîşê protokolî de ANHA rê qisey kerd û da zanayene ke înan heyetî ra waşt ke cergê DAÎŞî bêrê hukmkerdene û Îstasyonê Elokî binê tedaya Tirkîya ra bêro xelisnayene.
Goreyê doneyanê QSDyî Alamanya ra 1050 kesî tewrê DAÎŞî bibî û înan ra tewr tay 200 kesî destê QSDyî de yê. La heta nika Almanya qet derheqê nê cergan de tênêgêraye.
Hukmatê Almanya seba ke 'Îdareyê Xoserî reyde nêra têhet' bi serran cerganê almanan reyde têkilîye naye ro û nêwaşt înan bera Almanya û hukm bikera.
2800 cergê DAÎŞî nika destê YPG/QSDyî de yê. Înan ra tewr tay 800 tenî hemwelatîyê Ewropa yê. Heta nika Fransa, Danîmarka, Endonezya, Rûsya, Fas û Sudan Îdareyê Xoserî ra hemwelatîyê xo waştî û girewtî.
