Komîteya Perwerdeyî ya KCKyî bi wesîleya 21ê Sibate Roja Ziwanê Dayîke ya Dinya eşkerayîya nuştekîye daye û nê vatî:

''Dinya de têna merdimî seba ke ziwanê ci cîyayî û ey bînî kişenî, înkar kenê û ziwanê ci qedexe kenê. Binê nameyê yew dewlete, yew netewe, yew ziwan, yew beyraqe û yew dînî de xeylê netewe, kultur û ziwanî raştê qirkerdişî ameyî. Netîceya polîtîayanê faşîstan de xeylê ziwan û kulturî  bi qirkerdişan ameyî çînkerdene, xeylê ziwan zî binê tehlukeyê qirkerdişî de yê.

Seke yeno zanayene 21ê Sibate 1999 de hetê UNESCOyî ra sey Roja Ziwanê Dayîke ame îlankerdene. Bado ke Roja Ziwanê Dayîke ameye qebulkerdene şarê ke ziwanê ci ameyî qedexekerdene tarîxê têkoşînê înan zî ame rojdem. Nê semedî ra 21ê Sibate semedê şaran ke estbîyayîşê ci binê tehlukeyî de yo  û ziwanê dayîke ra mehrum mendî zaf muhîm a. Neteweyê Yewbîyayeyî her çiqas 15ê Sibate semedê pawitişê ziwanan û heqanê şaran sey fermî qebul bikero zî, semedê wedaritişê qedexeyan ê ke netîceya polîtîkayanê asîmîlasyonî de vera ziwanan yenê caardene, gamanê pêtan nêerzeno. Rixmê qerarê UNESCOyî yê 1999î ziwan û kulturê şaran tehlukeyê çînbîyayîşî ra nêxelisîyayî.  

Heta ewro qet deletêke rîyê polîtîkayanê qirkerdişî yê kulturî ra nêameya muhakemekerdene û polîtîkayê qirkerdişî nêameyî mehkumkerdene. Bêşik qerarê Roja Ziwanê Dayîke muhîm o; la seba ke goreyê nê qeraran polîtîkayî nêameyî rayraberdene xeylê ziwanê bi tehlukeyê çînbîyayîşî rî bi rî yê.  Mîyanê nê netewe-dewletan de polîtîkaya asîmîlasyonî tewr zaf dewleta tirke rayra berde. Propagandaya 'tirkkerdişî'  û redkerdişê kurtîdtîye bi hewayêkê zaf wişkî yena caardene. Kurdkî her warê cuye de ameye qedexekerdene. Kesanê ke kurdkî qisey kerd ameyî tepiştene, kiştene û sey 'terorsît' ameyî îlankerdene. Şarê kurdî xeylê reyî raştê qirkerdişî ame. Seba ke vîrê kurdan çînbikerî, serkêşê ci, rayberê ci ameyî qetilkerdene. Kurdîstan de nameyê cayan ameyî bedilnayene. Nameyê koyan, deştan, dewan û bajaran ameyî tirkîkerdene. Seba ke şarê kurdî biqedîyo çîyo ke destê înan ra  yeno ame kerdene la şarê kurdî bi têkoşînê girdî estbîyayîşê xo pawit û polîtîkayê qirkerdişî betal kerdî.

Kurdkî ziwanan tewr kahana ê dinya ra yew a. Bi hezaran serrî yo ke şarê kurdî na herre de ciwîyeno. Kulturê ci yo xorîn est o. Coka rixmê heme polîtîkayanê qirkerdişî estbîyayîşê xo paweno. Serkêşîya Rayber Apoyî û Têgêrayîşê Azadîye yê Kurdîstanî de bi têkoşîn û xoverdayîşê girdî şarê kurdî estbîyayîşê xo pawit û ewro têkoşînê estbîyayîş û azadîye yê kurdan ame merhaleyêka bîne. Hinî qet hêzêk nêeşkeno estbîyayîşê kurdan înkar bikero. Şarê kurdî bîyo zanaye, wirişt payan ser û ver bi azadîye aver şino. Beyraqa têkoşînê azadîye, her warê cuye de ganî bi averberdişê kurdkî bêro têşanayene. Ganî şexis û komel wayîrê ziwan û kulturê xo bivejo.

Ganî heme şarê ma û dezgehê eleqedarî, vera her qeyde polîtîkayanê asîmîlasyonî bi tewirê afirnayox û qerardarî têkoşînê xo girdêr bikerê. Ganî têkoşînê semedê kurdkî bibo ziwanê perwerdeyî û aver şiro, bêro girdkerdene.  Rayber Apo averşîyayîşê ziwanî sey averşîyayîşê cuye hesibneno û wina vano: ''Yew komel çend ziwanê xo aver bêro hende eşkeno aver şiro. Eke yew komel ziwanê xo vînî bikero û bikewo binê hegemonyaya ziwananê bînan hende raştê zext û qirkerdişî yeno. Komelê ke wayîrê ziwanê xo mevejîyê erjê înan yê aqil, ehleq û estetîkî aver nêşinê û nê komelî sey komelê nêweşî û cuyeya trajîke rê mehkum benê.'

Wa nêro vîrakerdene ke pawitişê ziwanî pawitişê kulturî yo, pawtişê Kurdîstanî yo. Pawitişê ziwanê pawitişê demê vîyarteyî û ameyoxî yo. Her netewe bi ziwanê xo est o. Senî ke dare bi qoqê xo bena zergun, şarê kurdî zî bi ziwanê xo beno gird û hêzdar. Ganî domanî keye de ziwanê dayîke bimûsê û kuçeyan û mekteban de zî kurdkî bêro mûsnayene. Heqê perwerdeyê bi ziwanê dayîke heqo xozayî  yo û ganî her kes wayîrê nê heqî bivejo û semedê ci têkoşîn bikero.  Seba ke kurdkî bibo ziwano fermî û şarê kurdî bi ziwanê perwerde bivîno ganî her kes wayîrê ziwan û estbîyayîşê xo bivejo, her metodê têkoşînî bifîno dewre.  Ziwanê dayîkê ruh û bedenê merdimî/e yo.’ Merdim ganî beden û rohê xo bipawo. 21ê Sibate Roja Ziwanê Dayîke heme şaranê dinya rê û şarê Kurdîstanî rê pîroz bo!