Wekîla DEM Partî ya Mêrdînî Salîha Aydenîz Heyetê Pêroyî yê Meclîsî de  derheqê 21ê Sibate Roja Ziwanê Dayîke de qisey kerd û bale ante zext û çînhesibnayîşê vera kurdkî ser.

Salîha Aydenîz ard ziwan ke ziwanê dayîke heq o û ganî qanûnê bingeyî û huqûq de cayo xo bigîro û vat, '' Xeylê welatan de tirkî wayîrê statuyî ya la nê welatî parçe nêbîyî, qey şima hend kurdkî ra tersene?''

 Salîha Aydenîz vist vîrî ke bi milyonan kurdî kurdkî qisey kenê û nê vatî:  ''Tarîx û kulturê kurdkî xorîn o. Estbîyayîşê şaran bi qiseykerdişê ziwanê dayike bimana yo. Şarê kurdî semedê statuyî, ziwan, hemwelatîya seyyewbîne xover dano û bedelanê girdan dano. Ewro Tirkîya de kurdkî ya ke ziwanê bi mîlyonan kesan a, xeylê ziwanê dayîke yê bînî statuyê fermî ra mehrim yenê verdayene.''

Salîha Aydenîz îfa kerd ke tewr tay 33 dezgehê ke xizmetê perwerdeyê ziwanî danê ameyî qefilnayene, cayê şaredarîyan ke xebeta akademî û ziwanî kenê berê înan ameyî morkerdene û wina vat: ''Nê polîtîkayê asîmîlasyonî ke yenê rayraberdene vera ziwanê şaran û mîrasê kulturî hêrişêk o. Heqê ziwanê dayîke lutuf nîyo; çînhesibnayîşê ziwanê dayîke eslê xo de metodê şîdetî yo.  Xora Tirkîya de şîdeto sîstematîk yeno rayraberdene.

Eke ziwanê bi mîlyonan kesan kurdkî hema ziwanê perwerdeyî nîyo, na têna meseleya huqûqî nîya, polîtîkaya înkar û asîmîlasyonî ya. Nê welatî de heqê her kesî est o ke bi ziwanê dayîke perwerde bivîno. No heq nêeşkeno sey mewzûyê bazarîye û lutufî bêro ramojnayene. Ziwanê şaran zengînîye ya. Heqê ziwanê dayîke ke waştişê bi mîlyonan nêeşkeno bêro çînhesibnayene.''