5 rojnameger û akîvîstê heqanê merdiman ê ke muhakemekerdişê PDKyî 5 serrî cezaya zîndanî dîyaye ci, rojeyê mergî de yê. 5 kesan Şerwan Emin Şerwanî, Gohdar Muhammed, Ayaz Kerîm, Harîwan Îsa û Şivan Saîd 16ê sibata 2021î de Mehkemeya Ceza ya Hewlêrî de pê îdîaya 'casusîya PKKyî' ceza girewte. Cezaya înan hezîrana 2021î de ameye tesdîqkerdene.

Nê cezayan kerdişê rejîmê Baasî vist vîrî. Nuştox, roşnvîr, sîyasetmedar û hunermendanê Başûrî rewşe pê rejîmê Baasî daye têver. 

Goreyê vateyan zîndananê Başûrî de tewr tay 100 aktîvîstê komelê sivîlî estî. Koma 'rojnamegeran ê behdînanijan' reyde yewê ci avûkat û yewê ci zî akademîsyen 21 kesî rojeyê mergî de yê. Nê kesan pê rayîrê avûkatan da zanayene ke koxûşê înan de 130-150 kesî manenê, pêvînayîşê keye û avûkatan yenê astengkerdene û semedo ke cade vera bidîyê înan dest pê rojeyê mergî kerd.

Şarê Behdînanî û Başûrî wazeno ke cade cezaya ke dîyaya nê kesan bêra betalkerdene û sîstemê huqûqî bêro modernkerdene.

Rewşa ke mehkemeya 6ê êlule de qewimîyaya nîşaneya hêrsî bîye. Qîrayîşê keye û aktîvîstan her ca ra eşnawîyayî.

Keyeyê Şerwan Emîn Şerwanîyî vat: ''Keyeyê ma bi serran pêşmergetîye kerde, keyeyê ma seke baregehê PDKyî bi. Bedelê na fedakarî û kede no yo?''

Serra 2020î ra nata tedayê vera rojnameger û aktîvîstan zêdîyayî. Cara Başûr de krîzo ekonomîk esto û şaro ke nêeşkeno meaşê xo bigêro vera beno xizanêr. PDK zî sey Tirkîya çalakîkeran pê îdîaya 'terefgîrîya PKKyî' tepişneno. Na stratejîya binvistişê muxalîfan a. Tay dezgehê medya zî çalakîkeran û şarî terorîze kenê.

Rojeyê mergî yê aktîvîst û rojnamegeran newe ra têkoşîno heqdar ê têgêrayîşê azadîye vist rojdemê şarê Başûrê Kurdîstanî. Rayaumumîye rixmê pêro tedayan paştî dana nê rojeyê mergî. Bi taybetî partîyanê Goran û Neweya Nû paştî daye rojeyê mergî.